Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 142 Hüküm no: 103 Orijinal metin no: [27b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan Hatun bt. Abdullah’ın alacak davasının reddedildiği Mahmiye-i İstanbul’da Monla Hüsrev Mahallesi’nde sâkine İsmihan Hatun bt. Abdullah meclis-i şer‘-i hatîrde zevc-i mutallıkı işbu râfi‘u’l-kitâb Mustafa Efendi b. Abdullah mahzarında üzerine da‘vâ ve takrîr-i kelâm edip mahmiye-i mezbûrede Ekmekçioğlu vakfından icâreteyn-i ma‘lûmeteyni taht-ı tasarrufumda olup mahalle-i mezbûrda vâki‘ lede’l-ahâlî ma‘lûmü’l-hudûd menzilin nısfını mukaddemâ zevciyet beynimizde kāime iken ben infâk etmek üzre mezbûr Mustafa Efendi’ye ferâgat eylediğimden sonra lâkin ferâgat-ı mezbûre sahîha değil iken mezbûr Mustafa Efendi beni tatlîk eyledikde yine zikrolunan nısf hisseyi sana ferâgat eyleyim deyü bi-gayr-ı hakkın otuz esedî guruşumu ahz ü kabz etmeğin hâlâ meblağ-ı mezbûru mezbûr Mustafa Efendi’den taleb ederim suâl olunsun dedikde gıbbe’s-suâl mezbûr Mustafa Efendi cevâbında müdde‘iyye-i mezbûreye cihet-i uhrâdan otuz guruş deyni olmağın meblağ-ı mezbûr otuz guruşu müdde‘iyye-i mezbûre tamamen yedimden ahz ü kabz eylediğinde meblağ-ı mezbûrdan ve bedel deyü makbûzum olan meblağ-ı mezbûr otuz guruş da‘vâsından zimmetimi ibrâ-i âmm-ı kātı‘u’n-nizâ‘la ibrâ ve ıskāt etmişidi deyü def‘le mukābele edicek isre’l-istintâk ve’l-inkâr mezbûr Mustafa Efendi’den def‘-i mezbûra mübeyyine beyyine taleb olundukda udûl-i Müslimînden olup mahalle-i mezbûre ahâlîsinden Mehmed b. Abdülkerim ve Mustafa b. Hasan ve Mehmed Efendi b. İsmail nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müdde‘iyye-i mezbûre İsmihan’ın mezbûr Mustafa Efendi zimmetinde otuz guruş hakkı olmağın müdde‘iyye-i mezbûre meblağ-ı mezbûru ahz eylediğinde meblağ-ı mezbûrdan ve bedel deyü kabz eylediği sâlifü’z-zikr otuz guruş da‘vâsından mezbûr Mustafa Efendi’nin zimmetini bizim huzûrumuzda ibrâ-i âmm-ı kātı‘u’n-nizâ‘la ibrâ ve ıskāt eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince müdde‘iyye-i mezbûre İsmihan bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Muharrem li-sene ihdâ ve tis‘în ve elf. Şuhûdü’l-hâl: Mustafa b. Hüsam, Hasan Çelebi b. ( ), Hasan b. Mehmed, Mustafa b. Mehmed.