Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 143 Hüküm no: 104 Orijinal metin no: [27b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Abdullah’ın vefat eden kızından kalan evde hakkı olduğunu ispatladığı Mahmiye-i İstanbul’da Çıkrıkçı Kemâl Mahallesi’nde sâkine iken bundan akdem vefât eden Rukiye Hanım nâm sagīrenin verâseti babası Mîralem Hüseyin Paşa’ya [ve] vâlidesi Emine bt. Abdullah nâm hatuna münhasıra olup ba‘dehâ mezbûr Hüseyin Paşa dahi vefât edip verâseti zevce-i metrûkesi mezbûre Emine Hatun’a ve sulbî kebîr oğlu Mehmed Bey’e ve sulbiye kebîre kızı Fâtıma Hanım ve sulbiye sagīre kızları İsmihan ve Hatice ve Havva’ya ve sagīr oğlu Ahmed Bey’e münhasıra olup ba‘dehû mezbûre İsmihan dahi vefât edip verâseti li-ebeveyn karındaşı mezbûr Mehmed Bey’e ve li-eb kız karındaşları mezbûretân Havva, Fâtıma ve Hatice’ye ve er karındaşı mezbûr Ahmed Bey’e münhasıra olup ba‘dehâ mezbûre Havva dahi vefât edip verâseti li-eb er karındaşları mezbûrân Mehmed Bey’e ve Ahmed Bey’e ve kız karındaşı mezbûre Hatice ve Fâtıma’ya münnasıra olduğu şer‘an sâbit ve zâhir oldukdan sonra mezbûre Emine Hatun tarafından husûs-ı âti’l-beyâna vekîl olduğu yedinde olan mazmûnu müsbit hüccet-i şer‘iye ile sâbit olan Mehmed Bey b. Mustafa nâm kimesne meclis-i şer‘-i hatîr-i lâzımü’t-tevkīrde müteveffât-ı mezbûre Hatice ile mezbûr Ahmed Bey’in tesviye-i emirlerine kıbel-i şer‘den mansûb vasîleri olmağla müteveffâ-yı mezbûr Hüseyin Paşa’nın terekesinden menzil-i âti’l-beyâna bi’l-vesâye vâzı‘u’l-yed olan fahrü’l-akrân el-Hâc Mehmed Ağa b. Ahmed Efendi mahzarında bi’l-vekâle üzerine da‘vâ ve takrîr-i kelâm edip müteveffâ-yı mezbûr Hüseyin Paşa’nın hayatında yedinde mülk ve hakkı olup mahalle-i mezbûrda vâki‘ bir tarafdan Hamamcızâde Ahmed Çelebi mülkü ve ba‘zan müteveffât-ı mezbûre Hatice Hanım’ın menzili ve ba‘zan Mestci Mehmed veresesi mülkleri ve bir tarafdan sâbıkā deve ağası olan Osman Ağa mülkü ve bir tarafdan mezbûr Mehmed Bey’in menzili ve bir tarafdan tarîk-ı âm ile mahdûd olup tabaka-i ulyâda cihânnümâ ta‘bîr olunur bir köşk ve tabaka-i vustâda üç bâb oda ve beş sofa ve tabaka-i süflâda bir bâb oda ve iki kiler ve câmekânlı kulleteyn bir hamam ve fevkānî ve tahtânî iki mahzen ve dört bi’r-i mâ ve iki matbah ve üç kenef ve zât-ı eşcâr-ı müsmire ve gayr-ı müsmire hadîkayı müştemil dâhiliye ta‘bîr olunur mülk menzilini müteveffâ-yı mezbûr Hüseyin Paşa hayatında kızı müteveffât-ı evvel-i mezbûr Rukiye Hanım’a hâl-i sıgārında fâriğan ani’ş-şevâgil hîbe ve temlîk ve yine velâyeten sagīre-i mezbûre Rukiye Hanım için ittihâb ve temelluk [temellük] ve tesellüm edip menzil-i mahdûd-ı mezbûr merkūme Rukiye Hanım’ın mülk-i mevhûbu oldukdan sonra merkūme Rukiye Hanım ber-vech-i muharrer vefât eylediğinde verâseti babası müteveffâ-yı mezbûr Hüseyin Paşa ile vâlidesi müvekkile-i mezbûre Emine Hatun’a münhasıra olup menzil-i mezbûrun üç sehimden iki sehmi müteveffâ-yı mezbûr Hüseyin Paşa’ya ve bir sehmi müvekkile-i mezbûre Emine Hatun’a isâbet ve intikāl etmiş-iken vasîyy-i mezbûr el-Hâc Mehmed Ağa menzil-i mahdûd-ı mezbûrun cümlesini müteveffâ-yı mezbûr Hüseyin Paşa’nın mülkü olmak üzre bi’l-vesâye [28a] vâzı‘u’l-yed olmağın ber-vech-i muharrer üç sehimden müvekkile-i mezbûre Emine Hatun’a isâbet ve intikāl eden bir sehmi vekâletim hasebiyle vasîyy-i mezbûrdan da‘vâ ve taleb eylediğimde bana def‘ ü teslîmden imtinâ‘ eder suâl olunsun dedikde gıbbe’s-suâl ve akībe’l-inkâr vekîl-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup mahalle-i mezbûre imâmı olan Seyfullah Efendi b. Ahmed ve vâiz Ahmed Efendi b. ( ) ve müezzin Mehmed Halîfe b. ( ) nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-hakīka müteveffâ-yı mezbûr Hüseyin Paşa hayatında dâhiliye ta‘bîr olunan menzil-i mahdûd-ı mezbûru bizim huzûrumuzda kızı müteveffât-ı mezbûre Rukiye Hanım’a sagīre iken hîbe ve temlîk ve velâyeten kızı mezbûre Rukiye Hanım için kabz ve temellük ve tesellüm etmek ile menzil-i mahdûd-ı mezbûr müteveffât-ı mezbûre Rukiye Hanım’ın mülk-i mevhûbu olduğuna bu vech üzre şâhidleriz şehâdet dahi ederiz deyü edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müteveffât-ı mezbûre Rukiye Hanım’ın muhallefâtı olan menzil-i mahdûd-ı mezbûrun üç sehimden bir sehmi vâlidesi müvekkile-i mezbûre Emine Hatun için vekîl-i mezbûra def‘ ve teslîme vasîyy-i mezbûr el-Hâc Mehmed Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’l-hâmis ve’l-işrîn min-Zilka‘deti’ş-şerîfe li-sene tis‘în ve elf. Şuhûdü’l-hâl: İmâm Hüseyin Efendi b. Ahmed, Müezzin Mehmed Çelebi b. Ahmed, el-Hâc Ahmed b. İsa, Ahmed Çavuş tâbi‘-i Mehmed Ağa.