Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 145 Hüküm no: 105 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalender Mehmed Çelebi b. Abdullah’ın vefat eden ortağının vasîsine açtığı alacak davasının reddedildiği Mahmiye-i İstanbul’da Sultân Mehmed Han -aleyhi’r-rahmetü ve’l-gufrân- Câmi‘-i şerîfi kurbünde sâkin Kalender Mehmed Çelebi b. Abdullah nâm kimesne meclis-i şer‘-i hatîrde fi’l-asl medîne-i Âmid mahallâtından Câmi‘ü’l-kebîr Mahallesi’nden olup mahmiye-i mezbûrda Vâlide Hânı’nda müsâferet vechi üzre sâkin iken bundan akdem vefât eden el-Hâc Üveys b. Hasan’ın vasîyy-i muhtârı olmağla terekesine vâzı‘u’l-yed olan işbu bâ‘isü’l-kitâb el-Hâc Mustafa b. Sefer mahzarında üzerine da‘vâ ve takrîr-i kelâm edip müteveffâ-yı mezbûr ile hayatında nemâsı beynimizde alâ-tarîkı’l-münâsaha müşterek olmak üzre akd-i şirket edip mâlımdan beş bin iki yüz elli esedî guruş ifrâz edip müteveffâ-yı mezbûra teslîm ol dahi ba‘de’l-kabz kendi mâlı olan iki bin beş yüz guruşa halt eylediğinden sonra Basra’ya varıp meblağayn-ı mezbûreyn ile emti‘a-i mütenevvi‘a iştirâ eylediğinden sonra hâlâ vefât eyledikde vasîyy-i mezbûr ile muhâsebe gördüğümüzde meblağayn-ı mezbûreyn ve harc-ı gümrük ihrâc ve ben sermâyem olan meblağ-ı mezbûru ahz eyleyip iki bin beş yüz esedî guruş nemâ zuhûr etmeğin hâlâ meblağ-ı mezbûrun nısfı olan bin iki yüz elli guruşu vasîyy-i mezbûrdan taleb ederim suâl olunsun dedikde gıbbe’s-suâl vasîyy-i mezbûr el-Hâc Mustafa cevâbında müteveffâ-yı mezbûr hayatında ber-vech-i müşterek müdde‘î-i mezbûr ile akd-i şirket eylediğinden sonra gāibûn ani’l-meclis Erzurumî Bektaş Beşe nâm kimesneden bin esedî guruş ve Basra Paşası Hasan Paşa’dan bin guruş ve Ahmed Beşe nâm kimesneden beş yüz guruş istidâne ve kabz edip meblağayn-ı mezbûreyn halt o vech üzre cümlesi ile emti‘a iştirâ edip hatta minvâl-i muharrer üzre mezbûrûn yedlerinden cem‘an iki bin beş yüz guruş istidâne ve kabz ve emti‘a iştirâ eylediğini şuhûd mahzarında ikrâr dahi etmişidi deyücek isre’l-istintâk ve’l-inkâr vasîyy-i mezbûr el-Hâc Mustafa’dan takrîr-i meşrûhuna mutâbıka beyyine taleb olundukda udûl-i Müslimînden olup hâlâ Diyarbekir nakībi olan fahrü’s-sâdât es-Seyyid Zeyneddin Çelebi b. Ahmed ve el-Hâc Hüseyin b. [B]erdezâde nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müteveffâ-yı mezbûr el-Hâc Üveys hayatında ber-vech-i muharrer gāibûn-ı mezbûrûn Bektaş Beşe yedinden bin guruş ve Hasan Paşa yedinden bin guruş ve Ahmed Beşe yedinden beş yüz guruş cem‘an iki bin beş yüz esedî guruş istidâne ve kabz edip kendi sermâyem olan iki bin beş yüz guruş ile şerîkim Kalender Çelebi’nin mâlı olan beş bin iki yüz elli guruşa halt ve cümlesiyle emti‘a iştirâ eyledim deyü bizim huzûrumuzda ikrâr ve bizi işhâd etmişidi biz bu husûsa bu vech üzre şâhidleriz şehâdet dahi ederiz deyü her birleri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince müdde‘î-i mezbûr Kalender Mehmed Çelebi bî-vech mu‘ârazadan men‘ olunup mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Muharremi’l-harâm li-sene ihdâ ve tis‘în ve elf. Şuhûdü’l-hâl: Ahmed Beşe b. Abdullah el-Mübâşir, Şahin Ağa Diyarbekirli, Pehlivan Hasan Diyarbekirli, Hüseyin Beşe b. ( ), el-Hâc Hasan Çavuş b. el-Hâc Ali, el-Hâc Hüseyin tâbi‘-i Hekîmzâde, Osman Çelebi b. ( ), Edhem Çelebi b. Şahin, Ömer Ağa Malatyalı, Hekîmzâde Osman Çelebi.