Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 146 Hüküm no: 106 Orijinal metin no: [28b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kalender Mehmed Çelebi b. Abdullah’ın vefat eden ortağının terekesinden olan alacak davasının reddedildiği Fi’l-asl medîne-i Âmid mahallâtından Câmi‘-i Kebîr Mahallesi ahâlîsinden olup mahmiye-i İstanbul’da Vâlide Sultân Hânı’nda müsâferet vechi üzre sâkin iken bundan akdem vefât eden el-Hâc Üveys b. Hasan’ın hayatında şerîki olan Kalender Mehmed Çelebi b. Abdullah nâm kimesne meclis-i şer‘-i hatîrde müteveffâ-yı mezbûrun vasîyy-i muhtârı olmağla terekesine vâzı‘u’l-yed olan işbu bâ‘isü’l-kitâb el-Hâc Mustafa b. Sefer mahzarında üzerine da‘vâ ve takrîr-i kelâm edip müteveffâ-yı mezbûrun ber-mûceb-i defter-i kassâm terekesi olan on iki bin sekiz yüz kırk sekiz guruşdan yedimde olan hüccet-i şer‘iye nâtıka olduğu üzre beş bin iki yüz elli esedî guruş sermâyemi ben ahz ü kabz edip ve iki bin beş yüz guruş müteveffâ-yı mezbûrun sermâyesi ihrâc olunup ve müteveffâ-yı mezbûrun Diyarbekir’de iştirâ eylediği kırmızı bez bahâsı olan iki bin iki yüz altmış iki buçuk guruş ve gümrük harcı üç yüz yirmi altı guruş ve yine hayatında Hasan Paşa ve Bektaş Beşe ve Ahmed Beşe nâm kimesnelerden istidâne edip Basra’da emti‘a iştirâ eylediği iki bin beş yüz guruş ki min-haysü’l-mecmû‘ on iki bin sekiz yüz kırk sekiz guruş ihrâc olundukdan sonra vasîyy-i mezbûr tereke-i müteveffâ-yı mezbûrdan olup meblağ-ı mezbûrun fâidesinden hâsıl olan üç yüz esedî guruşu dahi ahz ü kabz etmekle müteveffâ-yı mezbûr nısfiyet üzre şerîkim olmağın meblağ-ı mezbûr üç yüz guruşdan bana isâbet eden yüz elli guruşu vasîyy-i mezbûrdan taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan ziyâde-i mezbûru mübeyyine beyyine taleb olundukda ityân-ı beyyineden izhâr-ı acz ve istihlâf etmeğin fi’l-hakīka ber-vech-i muharrer müteveffâ-yı mezbûrun terekesinden meblağ-ı mezbûr on iki bin sekiz yüz kırk sekiz guruşdan mâ‘adâ üç yüz esedî guruş dahi ahz etmeyip ve müteveffâ-yı mezbûrun terekesinden bir şey’ini ketm ü ihfâ ve kendi mesârifine sarfla istihlâk etmediğine vasîyy-i mezbûr el-Hâc Mustafa’ya yemîn teklîf olundukda ol dahi alâ-vefki’l-mesûl half billâhi te‘âlâ etmeğin mûcebince müdde‘î-i mezbûr Kalender Mehmed Çelebi bî-vech ta‘arruzdan men‘ birle mâ-vaka‘a bi’t-taleb ketb olundu. Fi’l-yevm min-Muharremi’l-harâm li-sene ihdâ ve tis‘în ve elf. Şuhûdü’l-hâl: es-Sâbıkūn.