Bab Mahkemesi 54 Numaralı Sicil (H. 1102 / M. 1691) cilt: 20, sayfa: 322 Hüküm no: 386 Orijinal metin no: [66b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todori v. Dimitri’nin evini, Kadızâde Mehmed Efendi Vakfı’na bey‘ bi’l-istiğlâl yoluyla satması Mahmiye-i İstanbul’da Çakırağa mahallesi sâkinlerinden Todori v. Dimitri nâm zimmî meclis-i şer‘-i şerîf-i enverde, mahmiye-i İstanbul’da Kadızâde Mehmed Efendi Vakfı’nın nukūd-ı mevkūfesine bi’l-fi‘il mütevellî olan el-Hâc Halil Efendi b. Abdülkādir mahzarında ikrâr-ı tâm ve takrîr-i kelâm edip, silk-i mülkümde olup mahalle-i mezbûrede vâki‘ bir tarafdan Yorgaki zimmî mülkü ve bir tarafdan Pilaşe nâm nasrâniye mülkü ve bir tarafdan Katereni zimmî mülkü ve bir tarafdan tarîk-i âm ile mahdûd büyût-ı adîdeyi müştemil mülk menzili, bi cemî‘i’t-tevâbi‘ ve’l-levâhık mütevellî-i mezbûr el-Hâc Halil Efendi’ye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi tarîki’l-istiğlâl altmış guruşa bey‘ ve teslîm, ol dahi ber vech-i muharrer mâl-ı vakf-ı mezbûr ile iştirâ ve kabz ve kabûl eyleyip, semeni olan meblağ-ı mezbûr altmış guruşu tamâmen mütevellî-i mezbûr yedinden ahz u kabz eylediğimizden sonra mütevellî-i mezbûr el-Hâc Halil Efendi yine menzil-i mahdûd-ı mezbûru gıbbe’t-tahliyeti’ş-şer‘iyye ve’t-tekābuzi’l-mer‘î beher senesi dokuzar guruşa olmak üzre târih-i kitâbdan üç sene tamâmına değin yirmi yedi guruş akd-i vâhid ile bana îcâr ve teslîm, ben dahi istîcâr ve kabz ve kabûl eyledim dedikde, gıbbe’t-tasdîki’ş-şer‘î mezkûr Todori meclis-i şer‘de i‘âde-i kelâm edip, müddet-i mezkûre tamâmında meblağ-ı mezbûr altmış guruş ile ücret-i merkūmu mütevellî-i mezbûra edâ etmezsem menzil-i mahdûd-ı mezkûru semen-i misli ile âhara bey‘ ve kabz-ı semene ve semeninden deyn-i mezkûr ile ücret-i merkūmu mütevellî-i mezbûra edâya ve fazla kalırsa bana îsâle tarafımdan işbu İbrahim Çelebi b. el-Hâc Mehmed’i azl ve in‘izâlden masûne vekâlet-i devriye ile vekîl nasb ve ta‘yîn eyledim dedikde, mezbûr İbrahim Çelebi dahi vekâlet-i mezbûreyi kabûl ve hizmet-i lâzımesini edâya ta‘ahhüd etmeğin, mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min şehri Cumâdelâhire li sene 1102. Şuhûdü’l-hâl: Osman Çelebi b. Abdullah, Ebûbekir Efendi b. Ahmed, Mehmed Çelebi b. Receb, Hızır Beşe b. Mahmud, Ahmed Beşe b. Mahmud, İbrahim Çelebi b. Ahmed.