Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 154 Hüküm no: 114 Orijinal metin no: [30b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud Efendi b. Zülfikar’ın Mahmud Efendi b. Ahmed’e olan borcunu ödemesi <> Vilâyet-i Rumeli’nde Raça kasabası ahâlîsinden olup bi-tarîkı’l-müsâfere mahmiye-i İstanbul’da Sultân Mehmed Medresesinde sâkin bâ‘isü’l-kitâb Mahmud Efendi b. Ahmed nâm kimesne meclis-i şer‘-i şerîfde sâbıkā Uyvar kādısı olan diğer Mahmud Efendi b. Zülfikar mahzarında üzerine da‘vâ ve takrîr-i kelâm edip mezbûr Mahmud Efendi’ye bundan akdem yüz elli yedi buçuk esedî guruşumu ikrâz ve teslîm ol dahi iktirâz ve tesellüm edip yedime had [hat] ve hatmini hâvî deyn temessükü dahi vermekle hâlâ suâl olunup meblağ-ı mezbûru bana edâ ve teslîme mezbûr diğer Mahmud Efendi’ye tenbîh olunmak matlûbumdur dedikde gıbbe’s-suâl mezbûr diğer Mahmud Efendi cevâbında müdde‘î-i mezbûr Mahmud Efendi’den ancak seksen esedî guruş ik[ti]râz ve kabz edip ziyâde yetmiş yedi buçuk guruş <> iktirâz ve kabz eyledim deyü ettiğim ikrârımda kâzib olduğumdan mâ‘adâ meblağ-ı mezbûr mukābelesinde eşyâ-i memlûkemden iki merdâne ferâce ve bir sîm kılıç ve bir sîm k[g]addâre ve iki sîm reşmeyi iki rahtımı müdde‘î-i mezbûr Mahmud Efendi’ye rehin vaz‘ ve teslîm ol dahi irtihân ve tesellüm etmişidi deyücek gıbbe’l-istintâk ve’l-inkâr mezbûr diğer Mahmud Efendi’den rehn-i mezbûruna beyyine taleb olundukda ityân-ı beyyine için istimhâl edip mehl-i şer‘î ile imhâl olundukdan sonra mezbûr diğer Mahmud Efendi ber-vech-i muharrer ettiği ikrârında kâzib olmayıp ve kendi dahi da‘vâ-yı meşrûhasında mubtıl olmadığına müdde‘î-i mezbûr Mahmud Efendi’ye yemîn teklîf gelmeğin [eylemeğin] ber-vech-i muharrer mezbûr diğer Mahmud Efendi yüz elli yedi buçuk esedî guruş ik[ti]râz ve kabz eyledim deyü ettiği ikrârında kâzib olmayıp kendi dahi da‘vâ-yı meşrûhasında dahi mubtıl olmadığına müdde‘î-i mezbûr Mahmud Efendi’ye yemîn teklîf olundukda ol dahi alâ-vefki’l-mesûl yemîn billâhi’l-aliyyü’l-a‘lâ etmeğin mûcebince meblağ-ı mezbûr yüz elli yedi buçuk esedî guruşu müdde‘î-i mezbûr Mahmud Efendi’[ye] edâ ve teslîme mezbûr diğer Mahmud Efendi’ye tenbîh birle mâ-vaka‘a bi’t-taleb ketb olundu. Fi’l-yevmi’s-sâbi‘ aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: el-Hâc Mustafa Çukadâr, Mehmed Çelebi b. Haydar, Ali Beşe b. Abdünnebi.