Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 155 Hüküm no: 116 Orijinal metin no: [30b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın Mahmud Bey b. Ahmed Paşa aleyhindeki alacak davasının reddedildiği Mahmiye-i İstanbul’da Çelebioğlu Mahallesi’nde sâkine Sâliha bt. Abdullah nâm hatun meclis-i şer‘-i şerîfde işbu bâ‘isü’l-kitâb fahrü’l-akrân Mahmud Bey b. Ahmed Paşa mahzarında üzerine da‘vâ ve takrîr-i kelâm edip mezbûr Mahmud Bey’e bundan akdem beynimizde ma‘lûm bir husûs için yüz elli aded esedî guruşumu def‘ ü teslîm ol dahi ahz ü kabz ve mesârifine sarfla istihlâk etmekle hâlâ meblağ-ı mezbûru mezbûr Mahmud Bey’den taleb ederim suâl olunsun dedikde gıbbe’s-suâl mezbûr Mahmud Bey cevâbında müdde‘iyye-i mezbûre meblağ-ı mezbûru bundan akdem benden da‘vâ ve taleb etdikde edâdan imtinâ‘ edip beynimizde münâza‘ât vukū‘undan sonra beynimize muslihûn tavassut edip meblağ-ı mezbûr da‘vâsından müdde‘iyye-i mezbûre ile beynimizde yetmiş esedî guruş <> üzerine inşâ-i akd-i sulh etdiklerinde müdde‘iyye-i mezbûre dahi sulh-i mezbûru kabûl ve bedel-i sulh olan meblağ-ı mezbûr yetmiş guruşu yedimden tamamen ahz ü kabz edip husûs-ı mezbûra müte‘allika âmme-i de‘âvî ve mutâlebâtdan zimmetimi ibrâ ve ıskāt eyledikden sonra husûs-ı mezbûr için hüccet vermeğe tarafından Ahmed Bey b. Hüseyin nâm kimesneyi Sunullah Çelebi b. Hamza ve Abdurrahman Çelebi b. Mehmed nâm kimesneler mahzarında vekîl etdikde mezbûr Ahmed Bey dahi ba‘de’l-kabûlü’l-vekâle bin seksen yedi senesi Saferü’l-hayrının yirmi beşinci gününde mahmiye-i mezbûrede vâki‘ Ahî Çelebi mahkemesinde nâibü’ş-şer‘ olan Mehmed Müstakīm Efendi huzûrunda vekâletini şâhidân-ı mezbûrân şehâdetleriyle isbât edip ber-vech-i muharrer husûs-ı mezbûru vekâleten mûmâ-ileyh Mehmed Müstakīm Efendi’ye tahrîr ettirip minvâl-i meşrûh üzre yedime bir kıt‘a hüccet-i şer‘iye vermişidi deyü min-külli’l-vücûh takrîr-i meşrûhunu nâtık ve târih-i mezbûr ile müverrah ve mûmâ-ileyh Mehmed Müstakīm Efendi’nin imzâ ve hatmini hâvî bir kıt‘a hüccet ibrâz edip def‘le mukābele edicek gıbbe’l-istintâk ve’l-inkâr mezbûr [Mahmud] Bey’den mazmûn-ı hüccet-i mezkûreye beyyine taleb olundukda udûl-i [31a] Müslimînden olup zeyl-i hüccetde isimleri tahrîr olunan kimesnelerden Hasan Çavuş b. Ahmed ve Mustafa Beşe b. Hüseyin nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘iyye-i mezbûre bundan akdem meblağ-ı mezbûr yüz elli esedî guruşu mezbûr Mahmud Bey’den da‘vâ ve taleb etdikde ol dahi edâdan imtinâ‘ edip beynlerinde nizâ‘-ı küllî vukū‘undan sonra beynlerine muslihûn tavassut edip müdde‘iyye-i mezbûreyi meblağ-ı mezbûr da‘vâsından mezbûr Mahmud Bey ile beynlerinde yetmiş esedî guruş üzerine inşâ-i akd-i sulh etdiklerinde müdde‘iyye-i mezbûre dahi sulh-i mezbûru kabûl ve bedel-i sulh olan meblağ-ı mezbûr yetmiş esedî guruşu mezbûr Mahmud Bey yedinden tamamen ahz ü kabz edip husûs-ı mezbûra müte‘allika âmme-i de‘âvîden mezbûr Mahmud Bey’in zimmetini ibrâ-yı âm ile ibrâ ve ıskāt etdiğinden sonra husûs-ı mezbûr için hüccet vermeğe tarafından mezbûr Ahmed Bey’i mezbûrân Sunullah Çelebi b. Hamza ve Abdurrahman Çelebi b. Mehmed mahzarlarında vekîl edip mezbûr Ahmed Bey dahi ba‘de-kabûlü’l-vekâle târih-i mezbûrda mahkeme-i mezbûrda nâibü’ş-şer‘ olan mûmâ-ileyh Mehmed Müstakīm Efendi huzûrunda vekâletini şâhidân-ı mezbûrân ile isbât edip ber-vech-i muharrer <> mûmâ-ileyh Mehmed Müstakīm Efendi’ye hüccet-i mezkûreyi bizim huzûrumuzda tahrîr etdirmişidi biz müdde‘iyye-i mezbûrenin ber-vech-i muharrer sulh ve ibrâsına ve mezbûr Ahmed Bey’i vekîl etdiğine ve mazmûn-ı hüccet-i mezkûreye bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘iyye-i mezbûre bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’s-sâdis aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: Hasan b. Abdullah, Ahmed b. İbrahim, Mehmed Çelebi b. Haydar, Şa‘ban Efendi el-imâm, Hasan b. Mustafa.