Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 156 Hüküm no: 117 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman b. Ali’nin Emetullah Hatun’a olan borcunu ödemesi Mahmiye-i İstanbul’da Muhtesib İskender Mahallesi’nde sâkin iken bundan akdem vefât eden Bogāsıcı el-Hâc Hüseyin nâm müteveffânın sulbiye kebîre kızı ve vârisesi işbu râfi‘atü’l-kitâb Emetullah nâm hatun meclis-i şer‘-i hatîrde Osman b. Ali nâm kimesne mahzarında üzerine da‘vâ ve takrîr-i kelâm edip babam müteveffâ-yı mezbûrun merkūm Osman zimmetinde cihet-i şer‘îden üç yüz esedî guruş hakkı olup kable’l-istifâ vefât etmeğin bundan akdem zevcim ve vekîlim hazır bi’l-meclis Ömer Çelebi nâm kimesne vekâleten meblağ-ı mezbûru mezbûr Osman’dan taleb ve da‘vâ eylediğinde beynlerinde nizâ‘-ı küllî vukū‘undan sonra muslihûn tavassut edip meblağ-ı mezbûr da‘vâsından mezbûr Osman ile on beş bin akçeye sulh olup bedel-i sulh-i mezbûru bin seksen yedi senesi Cumâdelâhire gurresinden üç sene tamamına dek tecîl eyleyip hatta mezbûr Osman ber-vech-i muharrer müeccel ve mev‘ûd on beş bin akçe bana deyni olduğunu alâ-ruûsi’l-işhâd ikrâr ve hat [ve] hatmini hâvî deyn temessükü dahi verdiğinden sonra hâlâ ecel-i mezbûr hulûl ve mürûr etmeğin bedel-i sulh-i merkūm on beş bin akçeyi mezbûr Osman’dan taleb ederim suâl olunsun dedikde gıbbe’s-suâl mezbûr Osman cevâbında ber-vech-i muharrer deyn temessükü verdiğini ikrâr lâkin vech-i muharrer üzre on beş bin akçe deynim vardır deyü ikrârında kâzibim deyücek mezbûr Osman minvâl-i meşrûh üzre bedel-i sulh-i mezbûr on beş bin akçe deynim vardır deyü ikrârında kâzib olmayıp ve kendi dahi da‘vâ-yı meşrûhasında mubtıl olmadığına müdde‘iyye-i mezbûre Emetullah Hatun’a yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebince meblağ-ı mezbûr on beş bin akçeyi müdde‘iyye-i mezbûreye def‘ ü teslîme mezbûr Osman’a tenbîh birle mâ-vaka‘a bi’t-taleb ketb olundu. Fi’l-yevmi’t-tâsi‘ min-Muharremi’l-harâm li-sene ihdâ ve tis‘în ve elf. Şuhûdü’l-hâl: Berber Ali Çelebi b. Receb, Mehmed Çelebi b. Mahmud el-müezzin, Ali Bey b. Ahmed, Bakkāl Mehmed b. Yusuf, Mehmed Çelebi b. Haydar.