Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 157 Hüküm no: 118 Orijinal metin no: [31a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın alacak davasında torununun babası Hüseyin’le sulh olduğu Mahrûse-i Galata muzâfâtından kasaba-i Kasımpaşa’da Sirkeci Mahallesi’nde sâkin Hasan b. Hüseyin nâm sagīrin ceddesi ve hâdınesi Sâliha bt. Abdullah nâm hatun meclis-i şer‘-i hatîrde işbu bâ‘isü’l-kitâb sagīr-i mezbûrun babası mezbûr Hüseyin mahzarında ikrâr-ı tâm ve takrîr-i kelâm edip bundan akdem sadriye kızım olup sagīr-i mezbûr Hasan’ın vâlidesi olan Fâtıma nâm hatun vefât etdikde hakk-ı hıdâne benim olmağla sagīr-i mezbûr hacr ve terbiyemde olmağın nafaka ve kisvesi için babası mezbûr Hüseyin üzerine kıbel-i şer‘den beher yevm sekizer akçe farz ve takdîr olunup vakt-i zarûretde istidâneye ve lede’z-zafer babası mezbûra rücû‘a bana izin verilmekle ben-dahi [31b] âhardan istidâne ve sagīr-i mezbûrun levâzım-ı zarûriyesine harc ve sarf eylediğim yevmî sekizer akçeden yedi senede müctemi‘ olan yirmi bin yüz altmış akçenin mukaddemâ beş bin akçesini mezbûr Hüseyin yedinden alıp kabz edip lâkin meblağ-ı mezbûr yirmi bin yüz altmış akçeyi bi’t-tamam ahz eyledim deyü yedine hüccet-i şer‘iye verdiğimden sonra hâlâ bâkī kalan on beş bin yüz altmış akçeyi mezbûr Hüseyin’den taleb ve da‘vâ eylediğimde beynimizde münâza‘ât-ı kesîre vâkı‘a olmuşidi el-hâletü hâzihî muslihûn tavassut edip da‘vâ-yı mezbûrdan mezbûr Hüseyin <> ile beynimizde on kıt‘a esedî guruş üzerine inşâ-i akd-i sulh eylediklerinde ben-dahi sulh-i mezbûru kabûl ve bedel-i sulh olan meblağ-ı mezbûr on guruşu mezbûr Hüseyin yedinden bi’t-tamam ve’l-kemâl ahz ü kabz eyleyip meblağ-ı bâkī-i mezbûra ve sagīr-i mezbûrun nafakasına müte‘allika cemî‘ de‘âvî ve mutâlebât ve eymân ve muhâsamâtdan mezbûr Hüseyin’in zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim ba‘de’l-yevm mezbûr Hüseyin ile vechen mine’l-vücûh da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: Mustafa Efendi b. Mehmed el-imâm, Ramazan Beşe b. İsmail, Mehmed b. Murtaza, İbrahim Beşe b. Abdullah, Receb Beşe b. İsmail.