Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 160 Hüküm no: 120 Orijinal metin no: [32a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ümmühan bt. Sefer’in Hatice bt. Abdullah’a açtığı alacak davasının reddedildiği Mahmiye-i İstanbul’da Karabaş Mahallesi’nde sâkine Ümmühan bt. Sefer nâm hatun meclis-i şer‘-i şerîfde bâ‘isü hâze’l-kitâb Hatice bt. Abdullah nâm hatun mahzarında üzerine da‘vâ ve takrîr-i kelâm edip bundan akdem mezbûre Hatice’ye yirmi dokuz esedî guruş ile dört şerîfî altınımı bi-tarîkı’l-emâne def‘ ü teslîm ol dahi ahz ü kabz <> ve tesellüm eylediğinden sonra meblağ-ı mezbûrun mezbûre Hatice’den on guruşu ile dört şerîfî altınımı ahz ü kabz edip bâkī yirmi esedî guruşum mezbûre Hatice’nin zimmetinde kalmağla suâl olunup meblağ-ı bâkī-i mezbûru mezbûre Hatice’den bana alıverilmesi matlûbumdur dedikde gıbbe’s-suâl ve’l-inkâr müdde‘iyye-i mezbûre Ümmühani’den ziyâde da‘vâsı için mübeyyine beyyine taleb olundukda ityân-ı beyyineden izhâr-ı acz edip istihlâf etmeğin fi’l-hakīka müdde‘iyye-i mezbûrenin ber-vech-i muharrer ziyâde yirmi guruşunu dahi bi-tarîkı’l-emâne ahz ve tesellüm etmeyip red ve damâ[n]dan üzerine bir nesne lâzım gelmediğine mezbûre Hatice’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebince müdde‘iyye-i mezbûre bî-vech mu‘ârazadan men‘ <> olundukdan sonra müdde‘iyye-i mezbûre Ümmühan merkūme Hatice’nin zevci Osman b. Halil [mahzarında] ikrâr ve takrîr-i kelâm edip mezbûr Osman ile husûs-ı mezbûra müte‘allika da‘vâm olmayıp zimmetini ibrâ-yı âm ile ibrâ ve ıskāt eyledim dedikde mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Muharremi’l-harâm li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Ahmed Çelebi b. Piyale, Mustafa Çelebi b. Ahmed, Mehmed Bey b. Cafer.