Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 160 Hüküm no: 121 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcundan dolayı hapiste olan Doriş v. Arslan’ın salıverildiği Vilâyet-i Anadolu’da Çemişkezek kazâsına tâbi‘ Norsi nâm karyeden olup gāib ani’l-meclis Fazlullah Beşe nâm kimesneye cihet-i şer‘iyeden olan elli üç bin akçe deyni için yüz yetmiş sekiz günden beri mahmiye-i İstanbul’da vâki‘ sicn-i sultânîde habsolunan Doriş v. Arslan’ın iflâsı sâbit olursa habsden ıtlâk olunmak bâbında fermân olunmağın mezbûr Doriş’den ber-vech-i âtî istihbâr-ı şer‘î sudûrundan sonra karye-i mezbûre ahâlîsinden olup nişastacı tâifesinden Mahmud Beşe b. Hüseyin ve İsmail b. Hüseyin ve diğer İsmail b. Mehmed ve Mehmed b. İbrahim ve Sefer b. Hüseyin nâm kimesneler li-ecli <<’ş-şehâde>> ‘l-ihbâr meclis-i şer‘a hâzırûn olup fi’l-hakīka deyn-i mezbûr için yüz yetmiş sekiz günden beri sicn-i sultânîde habsolunan müstahber-i merkūm Doriş müflis ve mu‘dim ve fakīr olup üzerinde lâbis olduğu esvâbından gayrı ism-i mâl ıtlâk olunur bir şey’i ve bir habbesi olmadığı ma‘lûmumuzdur deyü her biri alâ-tarîkı’ş-şehâde haber verdikden sonra mahmiye-i mezbûrda Gedikpaşa kurbünde sâkin ekmekçi tâifesinden Takes v. Daver ve karındaşı Parsıh v. Arslan nâm zimmîler medyûn-ı mezbûr Doriş’in nefsine hîn-i mutâlebede meclis-i şer‘a ihzâra kefâlet-i sahîha-i şer‘iye ile kefîl olmalarıyla mâl ve yesârı zâhir olunca medyûn-ı merkūm Doriş habsden ıtlâk birle mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: el-Hâc Mustafa Çukadâr, Ahmed Çelebi b. Piyale, Mehmed Çelebi b. Haydar.