Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 161 Hüküm no: 122 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hayrunnisa Hatun bt. Şaban’ın Saniye Hatun bt. Mehmed Efendi’ye açtığı mirasla ilgili alacak davasının reddedildiği Mahmiye-i İstanbul’da Koğacı Dede Mahallesi’nde sâkin iken bundan akdem vefât eden İmâm Mehmed Efendi b. Ahmed’in verâseti zevce-i menkûha-i metrûkesi Sâniye Hatun bt. Mehmed Efendi ile babası mezbûr Ahmed Efendi’nin li-ebeveyn kız karındaşı Hayrunnisa Hatun bt. Şa‘ban’a münhasıra ve tashîh-i mes’elesi dört sehimden i‘tibâr olunup sihâm-ı mezbûrenin bir sehmi mezbûre Sâniye Hatun’a üç sehmi mezbûre Hayrunnisa Hatun’a isâbet eylediği şer‘an mütehakkık oldukdan sonra mezbûre Hayrunnisa tarafından vürûdu müsbit nakl ile vekîl ve dâmadı Ali Çelebi b. Hasan meclis-i şer‘-i hatîr-i lâzımü’t-tevkīrde mezbûre Sâniye <> tarafından husûs-ı âti’l-beyânda husûmet ve redd-i cevâba müseccel vekîl olan bâ‘isü hâze’l-kitâb Mehmed Efendi b. Şeyhzâde Abdullah Efendi mahzarında bi’l-vekâle da‘vâ ve takrîr-i kelâm edip mezbûre Sâniye Hatun müteveffâ-yı mezbûr İmâm Mehmed Efendi terekesinden sekizer bin akçe kıymetli <> üç müsta‘mel samur kürk ve beşer yüz akçe kıymetli iki sof ferâce ve ikişer yüz akçe kıymetli beş aded kitâb ve yüz yirmi beşer akçe kıymetli on beş vukıyye evânî ve bin akçe kıymetli bir sîm kılıç ve iki yüz akçe kıymetli bir sîm bıçak ve bin akçe kıymetli bir sîm raht ve her birisi sekizer yüz akçe diğer altı kıt‘a Kelâmullah ve onar bin akçe kıymetli dört re’s câriye ve Kasımpaşa’ya getirip ketm ü ihfâ eylediği dört yüz guruş ile beş bin akçe kıymetli bir re’s câriye ve iki bin akçe kıymetli üç bohça esbâb ve yedi yüz şerîfî altın ve bin yüz akçe kıymetli iki sîm akreb sâ‘at ve bin akçe kıymetli bir müsta‘mel Cezâyir ihrâmı ve sekiz yüz akçe kıymetli bir orta keçesi ve yüz elli akçe kıymetli bir velenceyi ve mahalle-i mezbûrda vâki‘ ma‘lûmü’l-hudûd ve’l-müştemilât menzil ve Karabaş Mahallesi’nde vâki‘ kezâlik menzilinden tashîh-i mezbûr üzre müvekkileme isâbet eden hisse-i şer‘iyesini taleb ederim suâl olunsun dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip müvekkile-i mezbûre Sâniye Hatun’u istihlâf etmeğin mezbûre Sâniye Hatun hasta ve sahibetü’l-firâş olup meclis-i şer‘a huzûru müte‘azzir olduğu i‘lâm olunmağın kıbel-i şer‘den bi’l-iltimâs tahlîf için Mevlânâ Osman Efendi b. Mehmed irsâl olunup ol dahi zikrolunan Karabaş Mahallesi’nde mezbûre Sâniye Hatun’un sâkine olduğu menzile varıp zeyl-i kitâbda isimleri mastûr olan Müslimîn huzûrlarında akd-i meclis-i şer‘-i şerîf eyledikde mezbûre Sâniye Hatun’un zâtı zikrolunan Koğacı Dede Mahallesi’nde sâkin Abdülkadir Çelebi b. Ali ve Karabaş Mahallesi’nde sâkin Hüseyin Çelebi b. Mehmed ta‘rîfleriyle mu‘arrefe oldukdan sonra mezbûr Ali Çelebi huzûrunda mevlânâ-yı mezbûr meclis-i ma‘kūd-ı mezbûrda mezbûre Âişe [Sâniye] Hatun’a eşyâ-i mezbûreyi ve memlûkesini ve bi’l-cümle kalîl [ve] kesîr celîl ve hakīr müteveffâ-yı mezbûrun ism-i mâl ıtlâk olunur bir şey’i ketm ü ihfâ edip vücûh-ı şer‘iyeden bir vechile üzerine red ve damân lâzım gelmediğine yemîn teklîf eyledikde ol dahi alâ-vefki’l-mesûl yemîn billâhi’l-aliyyü’l-a‘lâ etmeğin vâki‘ hâli mevlânâ-yı mezbûr mahâllinde tahrîr ve ma‘an irsâl olunan Ali Çelebi b. Abdünnebi ve Mehmed Çelebi b. Abdullah ile meclis-i şer‘a gelip inhâ ve takrîr etmeğin müdde‘î-i mezbûr Ali Çelebi bilâ-beyyine bî-vech mu‘ârazadan men‘ birle mâ-vaka‘a bi’t-taleb ketb olundu. Fi’l-yevmi’l-hâmis aşer min-Muharremi’l-harâm li-sene ihdâ ve tis‘în ve elf. Şuhûdü’l-hâl: Fahrü’l-eimmeti’l-kirâm Abdullah Efendi b. eş-Şeyh Ahmed, fahrü’l-müderrisîn es-Seyyid Mustafa Efendi b. es-Seyyid Ahmed Efendi, Hüseyin Efendi b. Yunus, el-Hâc Halil Çelebi b. ( ), Mehmed Çelebi b. Şa‘ban.