Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 165 Hüküm no: 128 Orijinal metin no: [33b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Mehmed’in Ömer Bey b. Ali’ye olan borcunu ödemesi Vilâyet-i Rumeli’nde Babaeski kasabası ahâlîsinden işbu bâ‘isü’l-kitâb Ömer Bey b. Ali nâm kimesne Dîvân-ı Hazret-i Sadr-ı a‘zamî’de ma‘kūd meclis-i şer‘-i şerîfde Mahmud b. Mehmed nâm kimesne mahzarında üzerine da‘vâ ve takrîr-i kelâm edip mezbûr Mahmud zimmetinde bin doksan senesi Muharremi’l-harâm’ının yirmi beşinci günü târihiyle müverrah yedime verdiği hat ve hatmini hâvî işbu deyn temessükü nâtık olduğu üzre cihet-i karz-ı şer‘îden dokuz yüz otuz sekiz buçuk [guruş] hakkım olmağla hâlâ suâl olunup meblağ-ı mezbûr dokuz yüz otuz sekiz buçuk guruşu bana def‘ ve teslîme mezbûr Mahmud’a tenbîh olunmak matlûbumdur dedikde gıbbe’s-suâl mezbûr Mahmud cevâbında ber-vech-i muharrer müdde‘î-i mezbûra cihet-i mezbûreden meblağ-ı mezbûr dokuz yüz otuz sekiz buçuk guruş deyni olduğunu ikrâr lâkin meblağ-ı mezbûru bi’t-tamam müdde‘î-i mezbûra bundan akdem edâ ve teslîm eyledim deyü def‘le mukābele edicek gıbbe’l-istintâk ve’l-inkâr mezbûr Mahmud’dan def‘-i mezbûrunu mübeyyine beyyine taleb olundukda şâhidlerim âhar diyârdadır deyü ityân-ı beyyineden izhâr-ı acz edip müdde‘î-i mezbûra yemîn dahi vermemeğin mûcebiyle meblağ-ı mezbûr dokuz yüz otuz sekiz buçuk esedî guruşu müdde‘î-i mezbûr Ömer Bey’e edâ ve teslîme mezbûr Mahmud’a tenbîh birle mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Muharremi’l-harâm li-sene ihdâ ve tis‘în ve elf. Şuhûdü’l-hâl: Umdetü erbâbü’t-tahrîr ve’l-kalem Ali Efendi Tezkire-i ûlâ, zübdetü ashâbi’t-tastîr ve’r-rakām Mustafa Efendi Tezkire-i sâniye, Çukadâr el-Hâc Mustafa.