Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 166 Hüküm no: 129 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Porya’nın evini Pedros v. Şeryet’e sattığı Vilâyet-i Anadolu’da Eğin kazâsına tâbi‘ Sorak nâm karye sükkânından Petro v. Porya nâm zimmî meclis-i şer‘-i hatîr-i lâzımü’t-tekrîmde karye-i mezbûrdan işbu hâfızü’r-rakīm Pedros v. Şeryet nâm Ermeni muvâcehesinde ikrâr ve takrîr-i kelâm edip silk-i mülkümde münselik olup karye-i mezbûrda vâki‘ bir tarafdan Hak Nazar mülkü ve bir tarafdan inci dükkânı ve bir tarafdan bahçe ve bir tarafdan tarîk-ı âm ile mahdûd bir fevkānî ve bir tahtânî odaları ve iki kileri müştemil mülk menzilimi cümle tevâbi‘ ve levâhıkı ile mezbûr Pedros’a yüz yirmi beş esedî guruşa tarafeynden îcâb ve kabûlü hâvî bey‘-ı kat‘î ile bey‘ edip ol dahi iştirâ ve kabûl eyleyip semeni olan meblağ-ı mezbûru yedinden tamamen ahz ü kabz eylediğimden sonra menzil-i mahdûd-ı mezbûru mahâllinde zabt ve tasarruf ve tesellüme merkūm Pedros’u taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Muharremi’l-harâm sene 1091. Şuhûdü’l-hâl: Mehmed b. İbrahim, Mehmed b. Mustafa, Mustafa b. Ahmed, Mehmed Beşe b. Abdullah ve gayruhum.