Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 170 Hüküm no: 135 Orijinal metin no: [34b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdülaziz’in evini Abdi Beşe b. İbrahim’e sattığı Husûs-ı âti’l-beyânın mahâllinde tahrîri iltimâs olunmağın savb-ı şer‘-i mergūbdan irsâl olunan Mevlânâ Hüseyin Efendi b. Himmet sâbıkā Anadolu Kādıaskeri olan a‘lemü’l-ulemâi’l-izâm efdalü’l-fudalâi’l-fihâm fazîletli Mustafa Efendi hazretlerinin mahmiye-i İstanbul’da Tevkī‘î Cafer Çelebi Mahallesi’nde vâki‘ sa‘âdethânelerinde sâkin kethudâları olan el-Hâc İsmail Ağa’nın odasına varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i mübîn eyledikde mahalle-i mezbûrede sâkine Fâtıma bt. Abdülaziz Efendi nâm hatunun zevci ve tarafından husûs-ı âti’l-beyâna vekîli olduğu mezbûrenin zâtını ma‘rifet-i şer‘iye ile ârifân Hüseyin Efendi b. Yusuf ve el-Hâc Ahmed b. Zülfikar nâm kimesneler şehâdetleri ile şer‘an sâbit olan Mehmed Efendi b. Mustafa nâm kimesne meclis-i ma‘kūd-ı mezbûrda işbu bâ‘isü’l-kitâb Külahçı Abdi Beşe b. İbrahim nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin zevcem müvekkile-i mezbûrenin yedinde mülk ve hakkı olup mahmiye-i mezbûrede Abdi Subaşı Mahallesi’nde vâki‘ bir tarafdan Halil Çelebi menzili ve bir tarafdan Belkıs Hatun mülkü ve bir tarafdan Zekeriya Efendi odaları ve bir tarafdan tarîk-ı âm ile mahdûd olup fevkānî iki bâb odayı ve dehlizi ve tahtında bir bodrumu ve bir su kuyusunu ve Camcı Çeşmesi suyundan bir bacayı ve eşcâr-ı müsmire ve gayr-ı müsmireyi ve bir mikdâr hadîkayı müştemil olan mülk menzilini bi-cümleti’t-tevâbi‘ ve’l-levâhık ve kâffetü’l-hukūk [ve]’l-merâfık tarafeynden îcâb ve kabûlü hâvî bey‘-ı kat‘î ile <> iki yüz <> yetmiş iki buçuk esedî guruşa bi’l-vekâle mezbûr Abdi Beşe’ye bey‘ ve teslîm ol dahi ber-vech-i muharrer iştirâ ve tesellüm eylediğinden sonra semeni olan meblağ-ı mezbûr iki yüz yetmiş iki buçuk guruşu mezbûr Abdi Beşe yedinden işbu meclisde tamamen ahz ü kabz eyledim min-ba‘d menzil-i mahdûd-ı mezbûrda <> zevcem müvekkile-i mezbûrenin alâka ve medhali kalmayıp mezbûr Abdi Beşe’nin mülk-i müşterâsı ve hakk-ı sırfı olmuşdur keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î husûs-ı mezbûru mevlânâ-yı mezbûr mahâllinde tahrîr ba‘dehû ma‘an irsâl olunan Abdülfettah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ ve’l-işrîn min-Muharremi’l-harâm li-sene ihdâ ve tis‘în ve elf. Şuhûdü’l-hâl: Mehmed Efendi el-kâtib?, el-Hâc Mustafa Ağa b. Ali, Mehmed Ağa b. Ali, el-Hâc Abdurrahman b. Rasûl, Salih Çelebi b. Mehmed, el-Hâc Mehmed b. Hüseyin.