Bab Mahkemesi 54 Numaralı Sicil (H. 1102 / M. 1691) cilt: 20, sayfa: 325 Hüküm no: 388 Orijinal metin no: [67a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Ağa b. Halil’in, vekili Yusuf Bey b. Hasan’dan avarız bedelini tamamen aldığı Fi’l-asl vilâyet-i Anadolu’da Arapkir kasabasından olup, hâlâ mahmiye-i İstanbul’da müsâferet vech-i üzre sâkin zümre-i sipâhiyândan es-Seyyid Ahmed Ağa b. Halil nâm kimesne meclis-i şer‘-i şerîf-i enverde, işbu bâ‘isü hâze’l-kitâb Yusuf Bey b. Hasan nâm kimesne mahzarında ikrâr ve takrîr-i kelâm edip, bin doksan dokuz senesinde sefer-i hümâyûn için Memâlik-i Mahrûse’de umûmen beher üç avârız hânesinden yüz guruş bedel tahsîli fermân olunmağın, medîne-i Amid kazâsının bedel-i mezbûr mâlını cem‘ ve tahsîle ben fermân-ı şerîf ile mübâşir ta‘yîn olunup, tahsîle mübâşeret ettiğimde kazâ-i mezbûr nevâhîsinden Hani nâhiyesi ahâlîsine mahz-ı defter-i [ha]kānî ile isâbet eden bin yedi yüz on yedi guruş mâl-ı mezbûru nâhiye-i mezbûreden tahsîle ve bana îsâle tarafımdan mezbûr Yusuf Bey’i vekîl eylediğimde, ol dahi ba‘de kabûli’l-vekâle nâhiye-i mezbûre ahâlîsinden makbûzu olan mâl-ı mezbûrdan dokuz yüz yetmiş yedi guruşu medîne-i mezbûrede ve iki yüz elli guruşu bin yüz bir senesi Şevvâli’nin yirmi beşinci gününden mahmiye-i mezbûrede bana def‘ ve teslîm, ben dahi ber vech-i meşrûh meblağeyn-i mezbûreyn iki yüz yirmi yedi guruşu mübâşeretim hasebiyle merkūm Yusuf Bey’in yedinden ahz u kabz edip, mâ‘adâ bâ-fermân-ı âlî re‘âyâ fukarâsına in‘âm olunmuşidi. Hâlâ merkūm Yusuf Bey yedinde ve zimmetinde makbûzu olan meblağ-ı mecmû‘-ı mezbûr bin iki yüz yirmi yedi guruşdan bir akçe ve bir habbe bâkī kalmamışdır dedikde, gıbbe’t-tasdîki’l-mu‘teber ve’t-tahkīki’l-mukarrer mâ vaka‘a bi’t-taleb ketb olundu. Fi’l-yevmi’l-hâdî ve’l-ışrîn min Cumâdelâhire sene 1102. Şuhûdü’l-hâl: Yekçeşm Halil Ağa b. ( ), Kethüdâ Mustafa Efendi, Emîn-i Matbah-ı âmire, Ahmed Ağa b. Halil Ağa el-mezbûr, Sinan Odabaşı er-râcil, el-Hâc Hasan er-râcil, Ahmed Ağa b. Mustafa, Ali Çelebi b. Sunullah.