Bab Mahkemesi 54 Numaralı Sicil (H. 1102 / M. 1691) cilt: 20, sayfa: 325 Hüküm no: 389 Orijinal metin no: [67a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Ağa’nın Midilli’de yaptırdığı çeşmeler için vakfettiği dükkânları Mehmed Ağa b. Ramazan’a kiralaması Nefs-i Midilli’de sâkin yine medîne-i Midilli’de li vechillâhi te‘âlâ binâ [ve] ihyâ eylediği çeşmelerin vâkıfı ve yine kendi vakfına mütevellî olan umdetü’l-eşbâh İsmail Ağa meclis-i şer‘-i şerîf-i enverde, sâhibü hâze’l-kitâb Mehmed Ağa b. Ramazan mahzarında bi’t-tevliye takrîr-i kelâm ve ta‘bîr ani’l-merâm edip, işbu yedimde olan hücec-i şer‘iyye nâtık olduğu üzre husûs-ı mezbûr için vakıf musakkafâtından olup yine nefs-i Midilli Mısır Çarşısı’nda vâki‘ lede’l-ahâlî ve’l-cîrân ma‘lûmü’l-hudûd bir bâb gümrükhâne ve bir bâb kahve tahmîsi ve on bâb dekâkîn ve Uzunçarşı’da vâki‘ bir bâb kahvehâne ile beş bâb dekâkîn şartım üzre icâreteyn-i ma‘hûdeteyn ile âhara îcâr ve lâzım gelmekle, zikr olunan on sekiz bâb dekâkîn her biri külle yevmin beşer akçe ücret-i müecceleden yevmî dokuz akçe müeccele ve mecmû‘u bin üç yüz guruş mu‘accele ile bi’t-tevliye mezbûr Mehmed Ağa’ya icâr ve teslîm, ol dahi istîcâr ve kabûl [67b] ve mahallinde kabz eyledikden sonra mu‘accele-i mezkûr bin üç yüz guruşu vakıf için yedinden ahz u kabz edip ve lâzım gelen ta‘mîr ve termîmini dahi kendi mâlından edip mu‘accelesin hesâb ettirmek üzre mezbûra izin ve hat ve hatmini hâvî yedine temessük dahi vermişdim deyu temessük ibrâz edip nazar olundukda, fi’l-hakīka mazmûnu min külli’l-vücûh takrîr-i meşrûhuna muvâfık bulunup, mezbûr Mehmed Ağa dahi mütevellî-i mezbûru kelimât-ı meşrûhasında vicâhen tasdîk ve tahkīk etmeğin, işbu vesîka li ecli’l-istihkâm gıbbe’l-ibtigā ketb ve imlâ olundu. Fi’l-yevmi’s-sânî ve’l-ışrîn min Cumâdelâhire li sene 1102. Şuhûdü’l-hâl: Sinan Efendi b. Ali el-müezzin, Ahmed Ağa b. Sinan, Mehmed Ağa b. Abdullah, Hüseyin Efendi b. Abdullah, Abdullah b. Abdülmennân, Mustafa b. Mehmed ve gayruhüm.