Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 176 Hüküm no: 142 Orijinal metin no: [36b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Salih’in Hasan Ağa b. Abdullah’a borcu olduğunu ikrar ettiği Hılâl-i sutûrda mastûr olan husûsu mahâllinde ketb ü terkīm için savb-ı şer‘-i kavîmden irsâl olunan İmâmzâde Mehmed Efendi b. Mustafa Dârü’l-hilâfeti’l-aliyye Kostantıniyyeti’l-mahmiye’de Derviş Ali Mahallesi’nde sâkin umdetü’l-eşbâh ve’l-a‘yân Hasan Ağa b. Abdullah’ın menziline varıp zeyl-i kitâbda muharrerü’l-esâmî olan Müslimîn huzûrlarında akd-i meclis-i şer‘-i Nebevî etdikde Vilâyet-i Rumeli’nde Karasu Yenicesi kazâsına tâbi‘ Mîzânlı nâm karye ahâlîsinden zahru’l-emsâl Mehmed Ağa b. Salih meclis-i ma‘kūd-ı mezbûrda işbu sahibü’l-kitâb mûmâ-ileyh Hasan Ağa mahzarında bi’t-tav‘i’s-sâf ikrâr ve takrîr-i kelâm edip mûmâ-ileyh Hasan Ağa bana üç bin esedî guruş ikrâz ve teslîm ben-dahi iktirâz ve kabz ve tesellüm eyledim meblağ-ı mezbûr üç bin esedî guruş merkūm Hasan Ağa’ya zimmetimde lâzımü’l-edâ ve vâcibü’l-kazâ deynimdir dedikde mukırr-ı mezbûr Mehmed Ağa’nın ber-minvâl-i muharrer cârî ve sâdır olan ikrârını el-mukarru lehu’l-mezbûr Hasan Ağa bi’l-muvâcehe tasdîk ve bi’l-müşâfehe tahkīk etdikden sonra yine kazâ-i mezbûreye tâbi‘ Kûhistân nâm karye sükkânından Ahmed Ağa b. Mustafa meblağ-ı mezbûr üç bin esedî guruşa emir ve kabûlü hâviye kefâlet-i sahîha-i şer‘iye ile kefîl olmağın vâki‘ hâli mezbûr Mehmed Efendi mahâllinde ketb ü terkīm edip ba‘dehû cânib-i şer‘-i kavîmden ma‘an irsâl olunan Hüseyin Çelebi b. Ahmed ve Kenan b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis ve’l-işrîn mine’l-Muharremi’l-harâm li-sene ihdâ ve tis‘în ve elf. Şuhûdü’l-hâl: Umdetü’l-a‘yân Ali Ağa b. Bali Ağa-yı İstanbul sâbıkā, Ali Ağa b. Hasan, Halil Ağa b. İbrahim, Müezzin Mustafa Çelebi b. Mehmed, Mehmed Ağa b. Ali ve gayruhum.