Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 176 Hüküm no: 143 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Mehmed’in Mustafa Bey b. Osman’a borçlu olduğu üç müd buğdayın kıymetini ödemesi Vilâyet-i Anadolu’da Kebsud kazâsına tâbi‘ Yoğuncaali nâm karye ve gayri ze‘âmetden üç sehimden iki sehim hisseye berat-ı şerîf-i âlî-şân ile mutasarrıf olan işbu bâ‘isü’l-kitâb Mustafa Bey b. Osman meclis-i şer‘-i şerîf-i enverde Mustafa Ağa b. Mehmed mahzarında üzerine da‘vâ ve takrîr-i kelâm edip mezbûr Mustafa Ağa’nın ze‘âmeti mülhakātından olup Kirmasti kazâsına tâbi‘ Güneyler nâm karyede çiftliği olmağla bin doksan senesinde mârrü’z-zikr çiftlik ile ma‘an tasarrufunda olan tarlalarda hâsıl buğdaydan bana âid her bir müddü yirmi beş keyl-i İstanbûlî olmak üzre altı müd ve on üç keyl buğday öşürden bir müd ve on üç keylini kabza vekîlim olan işbu hazır bi’l-meclis el-Hâc Murad b. Ali’ye teslîm ol dahi ba‘de’l-ahz mâ‘adâ beş müd buğdayı âhara bey‘ ve semenini kendi mesârifine sarfla istihlâk edip hatta mezbûr el-Hâc Murad husûs-ı mezbûru târih-i kitâbdan yirmi beş gün mukaddem kasaba-i Mihaliç’de bi’l-vekâle taleb ve da‘vâ eyledikde mezbûr Mustafa Ağa mârrü’z-zikr buğdaydan üç müd öşrümü âhara bey‘ ve semenini kendi mesârifine sarfla istihlâk edip kıymeti[ni] bana red ve teslîm lâzım <> geldiğini şuhûd mahzarında ikrâr dahi etmiş-iken hâlâ mârrü’z-zikr öşrün kıymet-i şer‘iyesini bana teslîmden imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Mustafa Ağa cevâbında fi’l-hakīka hâl bâlâda tafsîl olunan minvâl üzre olup müdde‘î-i mezbûrun hissesine âid her bir müddü yirmi beşer keyl-i İstanbûlî olmak üzre ancak dört müd on üç keyl buğday öşür hâsıl olduğunu ikrâr lâkin mârrü’z-zikr öşrün mecmû‘unu târih-i kitâbdan altı ay mukaddem mahâllinde vekîl-i mezbûr el-Hâc Murad’a teslîm etmişidim deyü def‘ ile mukābele <> ve ziyâde iki müd buğday ile yirmi beş gün mukaddem kasaba-i Mihaliç’de üç müd buğdayı ber-vech-i muharrer i‘tirâfını bi’l-külliye inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden olup kasaba-i Mihaliç’de Abdullah Paşa Mahallesi’nde sâkin Mehmed b. el-Hâc Mustafa ve Mustafa b. Ahmed nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûr Mustafa Ağa târih-i kitâbdan yirmi beş gün mukaddem müdde‘î-i mezbûrun vekîli işbu merkūm el-Hâc Murad zikri mürûr eden beş müd buğdayı merkūm Mustafa Ağa’dan taleb ve da‘vâ eyledikde merkūm Mustafa Ağa müvekkil-i mezbûra âid öşür buğdayından her bir müddü yirmi beşer keyl-i İstanbûlî olmak [üzre] üç müd buğdayını ben âhara bey‘ ve semenini kendi mesârifime sarfla istihlâk eyledim deyü bizim huzûrumuzda ikrâr ve i‘tirâf eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye etdiklerinde ba‘de’t-ta‘dîl ve’t-tezkiye şehâdetleri makbûle oldukdan sonra müdde‘î-i mezbûrdan ziyâde müdde‘âsına beyyine taleb olundukda ityân-ı beyyineden izhâr-ı acz edip istihlâf edicek fi’l-hakīka bâlâda tafsîl olunan dört müd ve on üç keyl buğdaydan mâ‘adâ iki müd buğday öşür dahi hâsıl olmayıp ol vechile kıymet-i şer‘iyesini müdde‘î-i mezbûra teslîm lâzım gelmediğine merkūm Mustafa Ağa’ya yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle mârrü’z-zikr üç müd buğdayın vakt-i husûmetde olan kıymet-i şer‘iyesini ba‘de’s-sübût müdde‘î-i mezbûra teslîme merkūm Mustafa Ağa’ya tenbîh birle mâ-vaka‘a bi’t-taleb ketb olundu. Fi’l-yevmi’r-râbi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Ahmed, Mehmed b. Mustafa, Musa Efendi b. ( ), Mehmed Çelebi el-Muhzır, Ahmed Çelebi b. Piyale.