Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 178 Hüküm no: 144 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Mustafa ile Mehmed Ağa b. Mahmud’un alacak davasında sulh oldukları Mahmiye-i İstanbul’da Zeyrek kurbünde Çırçır Mahallesi’nde sâkin Ali Bey b. Mustafa nâm kimesne meclis-i şer‘-i hatîr-i lâzımü’t-tevkīrde mahmiye-i mezbûrede Akbıyık Mahallesi’nde sâkin Mehmed Ağa b. Mahmud mahzarında takrîr-i kelâm ve ta‘bîr ani’l-merâm edip merkūm Mehmed Ağa târih-i kitâbdan bir sene mukaddem Sofya’da mütesellim olmağla sen kaçkunsun deyü beni habsedip yirmi iki guruş kıymetli bir re’s doru bargir ve otuz beş guruş kıymetli bir re’s kula bargir ile dört yüz yetmiş esedî guruşumu bi-gayr-ı hakkın ahz ü kabz ve istihlâk eyledi deyü merkūm Mehmed Ağa’dan da‘vâ ve meblağ-ı mezbûr ile iki re’s bargirimi ber-vech-i meşrûh ahz ü kabzını şühûd-ı udûl ile şer‘an muvâcehesinde isbât dahi edip meblağ-ı mezbûr ile zikrolunan bargirlerin ba‘de’s-sübût kıymet-i şer‘iyelerini bana red ve teslîm etmek üzre merkūm Mehmed Ağa ilzâm dahi olundukdan sonra beynimize muslihûn tavassut edip merkūm Mehmed Ağa ile üç yüz esedî guruş üzerine beynimizde akd-i musâlaha olundukda ben-dahi sulh-i mezbûru kabûl ve bedel-i sulh-i mezbûru yedinden ba‘de’l-kabz ziyâdeye müte‘allika âmme-i da‘vâdan mezbûr Mehmed Ağa’yı ibrâ etmişimdir suâl olunup takrîri tahrîr olunmak matlûbumdur dedikde gıbbe’s-suâl mezbûr Mehmed Ağa cevâbında fi’l-hakīka hâlâ [hâl] bâlâda ketb olunan minvâl üzre olunup bedel-i sulh olunmak üzre medfû‘um olan meblağ-ı mezbûr üç yüz esedî guruşa müte‘allik mezbûr Ali Bey ile bi-vechin mine’l-vücûh da‘vâ ve nizâ‘ım yokdur deyü merkūm Ali Bey’in kelimât-ı meşrûhasını vicâhen tasdîk ve şifâhen tahkīk etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sânî min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Ahmed, Berber Hasan b. Hüseyin, İsmail b. İbrahim, el-Hâc Mustafa b. Haydar.