Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 178 Hüküm no: 145 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kuzattan Ömer Efendi’nin Halil Bey b. Hasan’a olan borcunu ikrar etmesinden sonra Ömer Efendi’nin zevcesi Fâtıma’nın ilgili meblağa kefil olduğu Mahmiye-i İstanbul’da Pirinççi Sinan Mahallesi’nde sâkin zümre-i kuzâtdan Ömer Efendi b. el-Hâc Ali meclis-i şer‘-i hatîr-i lâzımü’t-tevkīrde re’fetlü ve sa‘âdetlü Hadîce Sultân -dâmet ismetühâ- hazretlerinin teberdârlarından işbu bâ‘isü’l-kitâb Halil Bey b. Hasan mahzarında bi’t-tav‘i’s-sâf ikrâr-ı tâm ve takrîr-i kelâm edip mezbûr Halil Bey bana iki yüz seksen esedî guruş ikrâz ve teslîm ben-dahi iktirâz ve kabz ve tesellüm eyledim meblağ-ı mezbûr iki yüz seksen esedî guruş zimmetimde lâzımü’l-edâ ve vâcibü’l-kazâ deynim olup meblağ-ı mezbûru târih-i kitâbdan seksen bir gün tamamında edâ ve teslîme ta‘ahhüd eyledim dedikde gıbbe’t-tasdîkı’ş-şer‘î mukırr-ı mezbûrun hâlâ zevcesi Fâtıma bt. Abdullah nâm hatun tarafından zikri âtî husûsa vekîl olup zât-ı mezbûreyi ma‘rifet-i şer‘iye ile ârifân olan yine mahalle-i mezbûre ahâlîsinden Mustafa b. Ali ve Mehmed b. Abbas şehâdetleriyle şer‘an vekâleti sâbite olan Hasan Çelebi b. Mustafa meclis-i şer‘de merkūm Halil Bey mahzarında bi’l-vekâle ikrâr ve i‘tirâf edip müvekkilem mezbûre Fâtıma Hatun meblağ-ı mezbûr iki yüz seksen esedî guruşa emir ve kabûlü hâvî kefâlet-i sahîha-i şer‘iye ile kefîl oldu dedikde mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Efendi b. Abdullah, Hasan Çelebi b. Mehmed, Derzi Mehmed Beşe, Ahmed Çelebi b. Haydar, Mehmed Çelebi b. Piyale.