Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 181 Hüküm no: 148 Orijinal metin no: [38a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Satılmış’ın üzüm bağını Veli Beşe b. Ahmed’e sattığı Vilâyet-i Anadolu’da nefs-i Çorum kasabası sükkânından olup hâlâ bi-tarîkı’l-müsâfere mahmiye-i İstanbul’da Üçler Mahallesi’nde sâkin Mustafa b. Satılmış nâm kimesne meclis-i şer‘-i şerîf-i enverde yine kasaba-i mezbûre ahâlîsinden olup müsâferet vechi üzre mahmiye-i mezbûrede Derviş Ali Mahallesi’nde sâkin işbu bâ‘isü’l-kitâb Veli Beşe b. Ahmed nâm kimesne mahzarında ikrâr-ı tâm ve takrîr-i kelâm edip zikrolunan Çorum Sancağı’nda Mehmed Selâm kazâsına tâbi‘ Kuyumcu nâm karyede vâki‘ bir tarafdan Kavaloğlu Abdullah nâm kimesne bağına ve bir tarafdan Kal‘alı Hüseyin nâm kimesne bağına ve bir tarafdan Rıdvan nâm kimesne bağına <> ve bir tarafdan tarîk-ı âmma müntehî olan bir kıt‘a kürûmî bağımı bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık mezbûr Veli Beşe’ye kırk iki buçuk esedî guruşa tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk ol dahi iştirâ ve temellük [ve] kabûl eyledikden sonra semeni olan meblağ-ı mezbûr kırk iki buçuk esedî guruşu mezbûr Veli Beşe yedinden ahz ü kabz edip bağ-ı mezkûru mahâllinde kabz ve tasarrufa Veli Beşe’yi taslît eyledim ba‘de’l-yevm mârrü’z-zikr bağ merkūm Veli Beşe’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ min-Saferü’l-hayr sene ihdâ ve tis‘în ve elf. Şuhûdü’l-hâl: Mustafa Efendi b. Mehmed Efendi, Mehmed Beşe b. Mustafa, Hızır b. Bayram, Ali b. Hüseyin, Mustafa b. Osman, Ömer Efendi b. Kasım ve gayruhum.