Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 182 Hüküm no: 149 Orijinal metin no: [38a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mardiros v. Arakel’in vefat eden Mustafa b. Abdullah’a olan borcunu varislerine ödemesi Mahmiye-i İstanbul’da Defterdâr Ahmed Çelebi Mahallesi sükkânından iken bundan akdem vefât eden el-Hâc Mustafa b. Abdullah nâm kimesnenin verâseti zevce-i metrûkesi Safiye bt. Süleyman nâm hatun ile sulbiye sagīre kızı Âişe’ye münhasıra olduğu şer‘an zâhir ve müte‘ayyin oldukdan sonra kendi tarafından asîl ve sagīre-i mezbûre Âişe’nin tesviye-i emrine savb-ı şer‘-i enverden mansûbe vasîsi olan vâlidesi işbu râfi‘atü’l-kitâb mezbûre Safiye Hatun meclis-i şer‘-i şerîf-i enverde Mardiros v. Arakel nâm zimmî muvâcehesinde asâleten [ve] vesâyeten üzerine da‘vâ ve takrîr-i kelâm edip müteveffâ-yı mezbûr el-Hâc Mustafa’nın merkūm Mardiros zimmetinde cihet-i karz-ı şer‘îden on sekiz esedî guruş hakkı olup meblağ-ı mezbûru kable’l-ahz mezkûr el-Hâc Mustafa vefât etmekle meblağ-ı mezbûr on sekiz esedî guruş bi’l-irsi’ş-şer‘î bana ve sagīre-i mezbûre Âişe’ye isâbet ve intikāl etmeğin hâlâ meblağ-ı mezbûru merkūm Mardiros’dan asâleten ve vesâyeten taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Mardiros cevâbında fi’l-hakīka müteveffâ-yı mezbûr[a] cihet-i mezkûreden zimmetimde on sekiz esedî guruş deynim olup meblağ-ı mezbûru kable’l-ahz mezkûr el-Hâc Mustafa vefât etmekle meblağ-ı mezbûr merkūme Safiye ile sagīre-i mezbûre Âişe’ye bi’l-irsi’ş-şer‘î isâbet ve intikāl etmişidi lâkin meblağ-ı mezbûr on sekiz esedî guruşu merkūme Safiye’ye tamamen edâ ve teslîm eyledim deyü def‘le mukābele edicek gıbbe’l-istintâk ve’l-inkâr mezbûr Mardiros’dan def‘-i meşrûhunu mübeyyine beyyine taleb olundukda ityân-ı beyyineden izhâr-ı acz ve istihlâf edicek fi’l-vâki‘ merkūm Mardiros zimmetinde cihet-i mezkûreden olan meblağ-ı mezbûr on sekiz esedî guruşu asâleten ve vesâyeten merkūm Mardiros yedinden tamamen ahz ü kabz etmediğine mezbûre Âişe’ye yemîn teklîf olundukda ol dahi hasbe’l-mesûl yemîn billâhi’l-aliyyü’l-a‘lâ etmeğin mûcebiyle meblağ-ı merkūm on sekiz esedî guruşu mezbûre Âişe’ye edâ ve teslîme merkūm Mardiros’a tenbîh birle mâ-vaka‘a bi’t-taleb ketb olundu. Fi’l-yevmi’s-sâdis min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Mehmed Çelebi b. Cafer, Mehmed Bey b. Dilaver, Ahmed Çelebi b. Piyale.