Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 182 Hüküm no: 150 Orijinal metin no: [38b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Ahmed’in evini Fâtıma Hatun bt. Abdurrahim’in vakfına istiğlal yoluyla sattığı Mahmiye-i İstanbul’da Lâleliçeşme kurbünde Mesih Paşa-yı Atîk Mahallesi’nde sâkin Ali Ağa b. Ahmed tarafından husûs-ı âti’z-zikri ikrâra vekîl olup Mehmed Bey b. Abdullah ve Ahmed Bey b. Mehmed şehâdetleriyle şer‘an vekâleti sâbite olan İvaz b. Abdullah meclis-i şer‘-i hatîr-i enverde kendi vakfına mütevelliye olan umdetü’l-muhadderât zübdetü’l-muvakkarât Fâtıma Hatun bt. el-merhûm Abdurrahim Efendi tarafından ikrâr-ı âti’z-zikri tasdîka vekîl olup bimâ-hüve nehcü’s-sübût şer‘an vekâleti sâbite olan Mehmed Efendi b. Muslı mahzarında bi’l-vekâle ikrâr ve takrîr-i kelâm edip müvekkilim mezbûr Ali Ağa’[nın] silk-i mülkünde münselik olup mahalle-i mezbûrede vâki‘ bir tarafı Solak Halil Çelebi menzili ve bir tarafı Hoca Hatun mülkü ve tarafeyni tarîk-ı âm ile mahdûd büyût-ı adîdeyi müştemil mülk menzilini bi-cümleti’t-tevâbi‘ ve’l-levâhık müvekkile-i mûmâ-ileyhâya beş yüz esedî guruşa bi-tarîkı’l-istiğlâl bey‘ ve teslîm ol dahi mal-ı vakf-ı mezbûr ile iştirâ ve kabûl ve semen-i mesfûr beş yüz esedî guruşu merkūm Ali Ağa’ya teslîm ol dahi tesellüm ve kabz etdikden sonra yine müvekkile-i müşârün-ileyhâ menzil-i mahdûd-ı mezbûru ba‘de’t-tahliyeti’ş-şer‘iye ve’t-takābuzı’l-mer‘î târih-i kitâbdan bir sene tamamına değin yetmiş beş esedî guruşa merkūm Ali Ağa’ya îcâr ve teslîm ol dahi istîcâr ve kabûl ve kabz eyledi dedikde gıbbe’t-tasdîkı’l-mu‘teber mahalle-i mezbûre ahâlîsinden Hüseyin Çelebi b. Muharrem menzil-i mezbûrun derkine ve şer‘an lâzım gelen ücrete emir ve kabûlü hâviye kefâlet-i sahîha-i şer‘iye ile kefîl oldukdan sonra vekîl-i mezbûr meclis-i şer‘de yine merkūm Mehmed Efendi mahzarında bi’l-vekâle ikrâr ve i‘tirâf edip müvekkil-i mezbûr müddet-i mezkûre tamamında asl-ı mal-ı mezbûr ile ücret-i mezkûreyi müvekkile-i mûmâ-ileyhâ Fâtıma Hatun’a edâ ve teslîm etmezse menzil-i mahdûd-ı mesfûru ba‘de’l-müzâyede ve inkıtâ‘ı’r-rağbe semen-i misli ile âhara bey‘ ve kabz-ı semene ve semen-i mezbûrdan deyn-i merkūmu müşârün-ileyhâya vakf için edâya ve fazlasını kendüye îsâle ve husûs-ı mezbûr mütevakkıf olduğu umûrun küllîsine azl ve in‘izâlden masûne vekâlet-i düyûna [devriye] ile merkūm Mehmed Efendi’yi tarafından vekîl ve nâib-i menâb nasb ve ta‘yîn eyledi dedikde ol dahi vekâlet-i mezbûreyi kabûl ve merâsimini edâya ta‘ahhüd etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Ali, Ebûbekir Efendi b. ( ), Mustafa Çelebi b. Abdülaziz, Mehmed Efendi b. Şa‘ban, Mehmed Efendi b. Mustafa.