Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 183 Hüküm no: 151 Orijinal metin no: [38b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Abdullah’ın Panayot v. Anderya’dan satın aldığı koyunların parasını ödemesi Mahmiye-i İstanbul hısnı ebvâbından Edirnekapısı hâricinde vâki‘ Emir Buhârî Câmi‘-i Şerîfî kurbünde sâkin işbu bâ‘isü’l-vesîka Panayot v. Anderya nâm zimmî Dîvân-ı Hazret-i Sadr-ı a‘zamî’de ma‘kūd meclis-i şer‘-i şerîf-i enverde mahmiye-i mezkûrede Cerrahpaşa Câmi‘-i Şerîfi kurbünde müsâferet vechi üzre sâkin Mehmed b. Abdullah nâm kimesne mahzarında üzerine da‘vâ ve takrîr-i kelâm edip ben bin seksen yedi senesi hilâlinde Havâss-ı Refî‘a kazâsı muzâfâtından Halîfe Köyü demekle ma‘rûf karyede nedve? ta‘bîr olunur bin altı yüz yirmi yedi re’s koyunlarımı her biri ikişer yüz onar akçeden min-haysü’l-mecmû‘ üç yük kırk bir bin altı yüz yetmiş akçeye mezbûr Mehmed’e bey‘ ve teslîm ol dahi iştirâ ve kabûl ve tesellüm etmiş-iken semen-i mezkûru bana edâdan imtinâ‘ eder suâl olunup meblağ-ı mezbûrun alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına beyyine taleb olundukda udûl-i ahrâr-ı Müslimînden olup yine mahmiye-i mezbûrede Çakır Ağa Mahallesi’nde sâkin İbrahim b. Ömer ve medîne-i Hazret-i Ebî Eyyûbi’l-Ensârî radıye anhü’l-Bârî’de saya kârhânesinde sâkin Süleyman b. İbrahim nâm kimesneler li-ecli’ş-şehâde meclis-i mezbûra hâzırân olup isre’l-istişhâd fi’l-vâki‘ müdde‘î-i mezbûr Panayot zikrolunan bin seksen yedi senesinde karye-i mezbûrede nedve? ta‘bîr olunur bin altı yüz yirmi yedi re’s koyunlarını her biri ikişer yüz onar akçeden min-haysü’l-mecmû‘ üç yük kırk bir bin altı yüz yetmiş akçeye mezbûr Mehmed’e bizim huzûrumuzda bey‘ ve teslîm ol dahi minvâl-i muharrer [üzre] iştirâ ve kabûl ve kabz ve tesellüm eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde şâhidân-ı mezbûrânı ta‘dîl ve tezkiye için savb-ı şer‘-i şerîfden irsâl olunan Mustafa Efendi b. Abdülaziz evvelâ mahalle-i mezbûreye varıp ahâlîsinden İmâm Yahya Efendi b. Mehmed ve Siyavuş Bey b. Abdullah ve Mustafa Bey b. Abdurrahim ve Müezzin [39a] Sefer Halîfe b. İslam ve Mehmed Bey b. Ahmed ve Hüseyin Çelebi b. İbrahim ve Şa‘ban ve İbrahim b. Halil ve Hüseyin Beşe b. İbrahim ve Salih Çelebi b. Mustafa ve Hüseyin Beşe b. Hasan’dan mezbûr İbrahim’in keyfiyet-i hâlini suâl etdikde her biri mezbûr İbrahim’in adl ve makbûlü’ş-şehâde olduğunu haber verdiklerinden sonra mârrü’z-zikr kârhâneye varıp ahâlîsinden Kasab Receb b. Hasan ve Mehmed Çelebi b. Ahmed ve Ârif Hasan b. Murad ve Ömer b. Murad ve Hasan b. Mehmed ve İbrahim Beşe b. Mehmed ve Salih Çelebi b. Şa‘ban ve Abdurrahim b. Haydar ve Ahmed b. Abdullah ve Hasan b. Ramazan’[dan] merkūm Süleyman’ın keyfiyet-i hâlini istikşâf etdikde mezbûr Süleyman’[ın] adl ve makbûlü’ş-şehâde olduğunu her biri haber vermeğin vâki‘ hâli mezbûr Mustafa Efendi mahâllinde ketb ü terkīm edip ba‘dehû cânib-i şer‘den ma‘an irsâl olunan Ramazan b. Mustafa ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye tamam ve şehâdetleri makbûle olmağın mûcebiyle ba‘de’l-hükm mâ-hüve’l-vâki‘ bi’t-taleb ketb olundu. Fi’l-yevmi’s-sâbi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: Ahmed Çavuş b. Mehmed, Mehmed Çavuş b. Haydar, el-Hâc Kemâleddin b. Müyesser, Bey Çerâğı el-Hâc Hüseyin Çavuş.