Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 185 Hüküm no: 152 Orijinal metin no: [39a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed’in evini Şa‘ban Efendi vakfının mütevellisine istiğlal yoluyla sattığı Dârü’l-hilâfeti’l-aliyye Kostantıniyyeti’l-mahmiye’de Ali Paşa-yı Atîk Mahallesi sükkânından Mustafa b. Mehmed nâm kimesne meclis-i şer‘-i şerîf-i enverde mahmiye-i mezbûrede Mismârî Mahallesi’nde vâki‘ merhûm Şa‘ban Efendi vakfına mütevellî olan işbu bâ‘isü’l-kitâb Şa‘ban b. Mürsel nâm kimesne mahzarında ikrâr ve i‘tirâf edip akd-i âtî sudûruna değin silk-i mülkümde münselik olup zikrolunan Ali Paşa-yı Atîk Mahallesi’nde vâki‘ bir tarafı Hasan Efendi ve Şahin Bey mülkleri ve bir tarafı mahalle-i mezbûre câmi‘i bahçesi ve bir tarafı tarîk-ı âm ile mahdûd bir bâb fevkānî oda ve bir mâbeyn odası ve sofa ve havluyu müştemil mülk menzilimi bi-cümleti’t-tevâbi‘ ve’l-levâhık mütevellî-i mezbûra üç yüz esedî guruşa bi-tarîkı’l-istiğlâl bey‘ ve teslîm ol dahi mal-ı vakf-ı mezbûr ile iştirâ ve kabûl ve tesellüm ve semeni olan meblağ-ı mezbûr üç yüz esedî guruşu bana teslîm ben-dahi ahz ü kabz ve tesellüm eylediğimden sonra yine mütevellî-i mezbûr menzil-i mezkûru ba‘de’t-tahliye ve’t-takābuz târih-i kitâbdan bir sene tamamına değin kırk beş esedî guruşa bana îcâr ve teslîm ben-dahi istîcâr ve kabûl ve kabz eyledim dedikde gıbbe’t-tasdîkı’ş-şer‘î mezbûr Mustafa meclis-i şer‘de Osman b. Hüseyin nâm kimesne mahzarında ikrâr ve i‘tirâf edip meblağ-ı mezbûr üç yüz esedî guruş ile ücret-i mezkûreyi müddet-i merkūme tamamında mütevellî-i mezbûra edâ ve teslîm etmezsem menzil-i mezkûru ba‘de’l-müzâyede ve inkıtâ‘ı’r-rağbe semen-i misli ile âhara bey‘ ve kabz-ı semene ve semeninden deyn-i merkūmu îfâya ve fazlasını bana îsâle azl ve in‘izâlden masûne vekâlet-i devriye ile mezbûr Osman’ı tarafımdan vekîl ve menâbıma nâib nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini edâya ta‘ahhüd etmeğin mâ-hüve’l-vâki‘ bi’t-taleb ketb olundu. Fi’l-yevmi’s-sâdis min-Saferü’l-hayr li-sene ihdâ ve tis‘în ve elf. Şuhûdü’l-hâl: el-Hâc Hüseyin b. Nasuh, Ömer Ağa b. Derviş, Molla Mehmed b. Mahmud, Solak Şa‘ban Çelebi b. Ali, Mehmed Efendi b. Mehmed.