Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 185 Hüküm no: 153 Orijinal metin no: [39a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Yusuf’un mutasarrıf olduğu zeametle ilgili alacak davasında Ahmed Çelebi ile sulh olduğu Mahmiye-i İstanbul’da Davudpaşa kurbünde müsâferet vechi üzre sâkin olup Vilâyet-i Rumeli’nde Çirmen Sancağı’nda Rodoscuk nâhiyesi ze‘âmetine berat-ı pâdişâhî ile mutasarrıf olan Ahmed Ağa b. Yusuf meclis-i şer‘-i hatîrde işbu bâ‘isü’l-kitâb es-Seyyid Ahmed Çelebi b. es-Seyyid Mehmed Çavuş mahzarında ikrâr ve takrîr-i kelâm edip bundan akdem ze‘âmet-i mezbûrenin bin doksan senesinde vâki‘ a‘şâr-ı şer‘iye ve rüsûm-ı örfiyesini mezbûr es-Seyyid Ahmed Çelebi’ye bin kıt‘a esedî guruşa der-uhde ol dahi iltizâm ve kabûl eyleyip yedi yüz otuz esedî guruşunu ber-vech-i peşîn yedinden ahz ü kabz eylediğimden sonra hâlâ bâkīsi olan iki yüz yetmiş esedî guruşunu dahi mezbûr es-Seyyid Ahmed Çelebi’den taleb ve da‘vâ eylediğimde ol dahi cevâbında ze‘âmet-i mezbûre bî-hâsıl olmağla âhara dokuz yüz guruşa der-uhde edip yüz guruş zarar eyledim demekle beynimizde münâza‘ât-ı kesîre ve muhâsamât-ı ekîde cereyânından [39b] sonra muslihûn tavassut edip da‘vâ-yı merkūmeden mezkûr es-Seyyid Ahmed Çelebi ile seksen beş esedî guruş üzerine beynimizde inşâ-i akd-i sulh eylediklerinde ben-dahi sulh-i mezbûru kabûl ve bedel-i sulh olan meblağ-ı mezbûr seksen beş guruşu yedinden bi’t-tamam ve’l-kemâl ahz ü kabz eyleyip bâkīsinden mezbûr es-Seyyid Ahmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb ve terkīm olundu. Fi’l-yevmi’s-sâmin min-Saferü’l-hayr li-sene ihdâ ve tis‘în ve elf. Şuhûdü’l-hâl: el-Hâc Hüseyin b. Nasuh, Mustafa Beşe b. Receb, Mehmed Çelebi Câbîzâde, Mehmed Ağa b. Ebîbekir Ağa, Siya[vuş] Bey b. ( ).