Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 186 Hüküm no: 154 Orijinal metin no: [39b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. Mehmed Bey’in arsa, bağ, harman yeri, kule gibi bazı mülklerini Mehmed Bey b. Durak’a sattığı Mahmiye-i İstanbul mahallâtından İmâm Ali Mahallesi’nde sâkin Silâhdâr Paşazâde demekle ma‘rûf Mustafa Bey b. Mehmed Bey meclis-i şer‘-i hatîr-i lâzımü’t-tevkīrde Vilâyet-i Rumeli’nde Bosna Eyâleti’nde Kırka ve Bihke sancaklarına mutasarrıf olan işbu bâ‘isü’l-kitâb Mehmed Bey b. Durak mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup zikrolunan Kırka Sancağı’nda vâki‘ Kotar nâhiyesinde Podberkan ma‘a Kampan Çiftliği demekle ma‘rûf çiftlikde vâki‘ lede’l-ahâlî ve’l-cîrân ma‘lûmü’l-hudûd harâbe menzil arsasını ve ona tâbi‘ lede’l-ahâlî ve’l-cîrân hudûd ve kat‘ı beynimizde ma‘lûm bağ ve harman yeri ve bostan yerini ve İvrana kal‘asında olan lede’l-ahâlî ve’l-cîrân ma‘lûmü’l-hudûd bir kıt‘a hân arsasını ve hamam arsasını ve taş duvarıyla ve sundurmasıyla ve sâir müştemilâtı ile bir kıt‘a kuleyi cümle-i tevâbi‘ ve levâhıkıyla tarafeynden îcâb ve kabûlü hâvî bey‘-ı kat‘î ile bin kıt‘a esedî guruşa mezbûr Mehmed Bey’e bey‘ ve temlîk ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr bin kıt‘a esedî guruşu mezbûr Mehmed Bey yedinden tamamen ahz ü kabz edip emlâk-i mezbûre mezbûr Mehmed Bey’in mülk-i müşterâsı olmağla emlâk-i mezbûreyi mahallerinde zabt ve tasarrufa mezbûr Mehmed Bey’i taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Bey b. İbrahim Paşa, Mahmud Bey b. İbrahim Paşa, Memi Halîfe b. ( ) sâkin-i İskardin, Zülfikar Kâtib b. Osman sâkin-i Velit, Ahmed b. Hüseyin sâkin-i Şobut, Hüseyin Çelebi b. ( ), Hasan Çelebi b. ( ), Mustafa Çelebi b. İsmail, Ali Bey b. Mahmud Ağa, Baba Ahmed Ağa, Mehmed Çelebi b. Haydar, Ahmed Çelebi b. Piyale, Mehmed Çelebi b. Cafer.