Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 187 Hüküm no: 155 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Yusuf b. Mehmed’in evini Mehmed Bey b. Hasan’a sattığı Mahmiye-i İstanbul’da Karabaş Mahallesi sükkânından el-Hâc Yusuf b. el-Hâc Mehmed nâm kimesne meclis-i şer‘-i şerîf-i enverde işbu râfi‘u’l-kitâb Mehmed Bey b. Hasan nâm kimesne mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrda vâki‘ bir tarafdan Arakiyeci Mehmed Çelebi mülkü ve iki tarafdan habbâz değirmeni ve fırını ve bir tarafdan tarîk-ı âm ile mahdûd fevkānî bir bâb oda ve bir matbah [ve] bir kiler ve bir sofa ve tahtânî bir bâb oda ve bi’r-i mâ ve zât-ı eşcâr-ı müsmire ve gayr-ı müsmire ve ahır ve havluyu müştemil bir bâb mülk menzilimi bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mezbûr Mehmed Bey’e üç yüz yirmi esedî guruşa bey‘ ve temlîk ve teslîm ol dahi ber-vech-i muharrer iştirâ ve kabûl ve temellük ve tesellüm eyledikden sonra semeni olan meblağ-ı merkūm üç yüz yirmi esedî guruşu mezbûr Mehmed Bey yedinden tamamen ahz ü kabz ve tesellüm eyledim ba‘de’l-yevm menzil-i mahdûd-ı mezkûr merkūm Mehmed Bey’in mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’t-tâsi‘ min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Seyyid Mustafa b. Mehmed, Mehmed Çelebi b. Ahmed, el-Hâc Mehmed b. Ömer, Süleyman b. Abdi, Ali b. Himmet, İbrahim b. Ömer, İbrahim Efendi el-imâm.