Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 192 Hüküm no: 162 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Solak Mustafa Çelebi b. Hızır’ın evini İsmail Efendi b. Muzaffer’e sattığı Vilâyet-i Rumeli’nde Zağra-i Atîk mahallâtından İmâret Mahallesi ahâlîsinden Solak Mustafa Çelebi b. Hızır nâm kimesne meclis-i şer‘-i hatîr-i lâzımü’t-tevkīrde fahrü’l-kuzât bâ‘isü hâze’l-kitâb İsmail Efendi b. Muzaffer nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülküm ve hakkım olup mahalle-i mezbûrede vâki‘ bir tarafdan ba‘zan Topal Ahmed menzili ile Poyçe zevcesi Nasrâniye mülkü ve üç tarafdan tarîk-ı âm ile mahdûd olup dâhiliyede fevkānî iki bâb odayı ve tahtânî iki bâb odayı ve bir ahırı ve bir su kuyusunu ve zât-ı eşcâr-ı müsmire ve gayr-ı müsmire bahçeyi ve bahçe içinde bir köşkü ve hâriciyede tahtânî bir bâb odayı müştemil olan mülk menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık ile tarafeynden îcâb ve kabûlü [hâvî] bey‘-ı kat‘î ile on dört bin akçeye mezbûr İsmail Efendi’ye bey‘ ve temlîk ol dahi ber-vech-i muharrer iştirâ ve temellük ve kabûl eylediğinden sonra semeni olan meblağ-ı mezbûr on dört bin akçeyi mezbûr İsmail Efendi yedinden tamamen ahz ü kabz edip min-ba‘d menzil-i mahdûd-ı mezbûrda asla ve kat‘a alâka ve medhalim kalmayıp mezbûr İsmail Efendi’nin mülk-i müşterâsı ve hakk-ı sırfı olmağla menzil-i mezbûru mahâllinde zabt ve tasarrufa mezbûr İsmail Efendi’yi taslît eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Ali Efendi b. Hasan, Mustafa Efendi b. Ahmed Edirnevî, Mehmed Efendi b. Ahmed, İmâm Ahmed Efendi Bağdâdîzâde.