Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 194 Hüküm no: 164 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ali Çelebi b. Mustafa’nın karısı ve kızının mûrislerinden kalan evin kendilerine düşen hisselerini İbrahim Çavuş b. Hasan’a sattıkları Mahmiye-i İstanbul’da Ali Paşa-yı Atîk Mahallesi’nde sâkin iken bundan akdem vefât eden Ali Çelebi b. Mustafa’nın verâseti zevce-i metrûkesi Şerife Âişe bt. Ahmed ve sulbiye kebîre kızı Şerife Fâtıma’ya ve sulbî sagīr oğlu es-Seyyid Mustafa’ya münhasıra ve tashîh-i mes’elesi yirmi dört sehimden i‘tibâr olunup sihâm-ı mezbûreden üç sehmi zevcesi mezbûre Şerife Âişe’ye ve yedi sehmi mezbûre Şerife Fâtıma’ya ve on dört sehmi sagīr-i mezbûra isâbet ve intikāl eylediği şer‘an sâbit ve zâhir oldukdan sonra mezbûre Şerife Âişe asâleten ve mezbûre Şerife Fâtıma tarafından husûs-ı âti’l-beyâna vekîl olduğu mezbûre Şerife Fâtıma’nın zâtını ma‘rifet-i şer‘iye ile ârifân el-Hâc Hüseyin b. Ramazan ve diğer el-Hâc Hüseyin b. Nasuh nâm kimesneler şehâdetleri ile şer‘an sâbit olan zevc Şâtır Mustafa Bey b. Ahmed nâm kimesne vekâleten meclis-i şer‘-i hatîr-i lâzımü’t-tevkīrde işbu bâ‘isü’l-kitâb es-Seyyid İbrahim Çavuş b. Hasan nâm kimesne mahzarında her biri ikrâr ve takrîr-i kelâm edip tereke-i müteveffâ-yı mezbûrdan bi-hasebi’l-irsi’ş-şer‘î bize intikāl edip mahalle-i mezbûrede vâki‘ bir tarafdan ba‘zan İbrahim Çelebi mülkü ve ba‘zan Belkıs Hatun mülkü ve ba‘zan el-Hâc Hasan mülkü ve bir tarafdan Kavukçu veresesi mülkleri ve iki tarafdan Mahmud Çelebi mülkü ve tarîk-ı âm ile mahdûd dâhiliyesinde fevkānî üç bâb odayı ve dehlizi ve eşcâr-ı müsmire ve gayr-ı müsmire hadîkayı ve müşterek bir su kuyusunu ve hâriciyede fevkānî bir bâb odayı ve tahtânî bir kenîf ve bir su kuyusunu müştemil olan mülk menzilimden sihâm-ı mezbûreden ber-vech-i muharrer bize isâbet eden sehimlerimizi cümle tevâbi‘iyle tarafeynden îcâb ve kabûlü hâvî bey‘-ı kat‘î ile iki yüz üç esedî guruşa mezbûr es-Seyyid İbrahim Çavuş’a bey‘ ve teslîm ol dahi ber-vech-i muharrer iştirâ ve tesellüm edip semeni olan meblağ-ı mezbûr iki yüz üç esedî guruşu mezbûr es-Seyyid İbrahim Çavuş yedinden tamamen ahz ü kabz eyledik ba‘de’l-yevm menzil-i mezbûrun sihâm-ı mezbûreden bize isâbet eden on sehminde bizim kat‘a alâka ve medhalimiz kalmayıp mezbûr es-Seyyid İbrahim Çavuş’un mülk-i müşterâsı olmuşdur keyfe mâ yeşâ’ ve yahtâr mutasarrıf olsun dediklerinde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis min-Saferü’l-hayr li-sene ihdâ ve tis‘în ve elf. Şuhûdü’l-hâl: Hüseyin Çavuş b. Mahmud, Mehmed Bey b. Ali, Halil b. Ali, Ahmed Çelebi b. Mahmud, Abdullah Efendi b. Ahmed.