Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 195 Hüküm no: 165 Orijinal metin no: [41b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Abdülbaki’nin ev, bağ ve tarlalarını kardeşi Hüseyin Bey’e sattığı Mahmiye-i İstanbul’da Ayasofya-i Kebîr Câmi‘-i Şerîfi kurbünde sâkin Hasan Ağa b. Abdülbaki nâm kimesne meclis-i şer‘-i şerîf-i enverde li-ebeveyn karındaşı işbu bâ‘isü’l-kitâb Hüseyin Bey nâm kimesne mahzarında ikrâ[r]-ı tâm ve takrîr-i kelâm edip akd-i âtî sudûruna değin silk-i mülkümde münselik olup Vilâyet-i Rumeli’nde Gölükesri kazâsına tâbi‘ Çetrok nâm karyede vâki‘ bir tarafı Mehmed b. Süleyman mülkü ve bir tarafı Süleyman nâm kimesne mülkü ve bir tarafı Terzi Ali mülkü ve bir tarafı tarîk-ı âm ile mahdûd iki kiler ve iki oda ve bir ahır ve bir samanlık ve bir hâriciye ahır yerini müştemil mülk menzilimi ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd yirmi üç dönüm dört kıt‘a bağımı bi-safkatin vâhidetin mezbûr Hüseyin Bey’e otuz beş bin akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk ol dahi iştirâ ve kabûl ve temellük edip ve yine karye-i mezbûrede vâki‘ lede’l-ahâlî ve’l-cîrân ma‘lûmü’l-hudûd ve’l-kat‘ takrîben yüz altmış dönüm tarlalarımı dahi [42a] ma‘rifet-i sahib-i arz ile merkūm Hüseyin Bey’e on beş bin akçeye ferâğ ve tefvîz ol dahi tefevvüz ve kabûl eyledikden sonra semen-i medfû‘u ile bedel-i merkūm cem‘an elli bin akçeyi karındaşım mezbûr Hüseyin Bey yedinden bi’t-tamam alıp kabz edip onları mahâllinde zabt ve tasarrufa taslît eyledim ba‘de’l-yevm menzil-i mezbûr ve bağlar mülk-i müşterâsı ve arâzî-i mezkûre hakk-ı makbûzudur keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Bey b. Ali, Mehmed b. Ali, Hüseyin b. Ahmed, Hüseyin Ağa b. Abdullah, Yakub Ağa b. ( ), Mahmud Ağa b. ( ), el-Hâc Hüseyin b. Abdullah.