Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 197 Hüküm no: 167 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadîce bt. Mustafa’nın evini Feyzullah Efendi b. Salahaddin’e sattığı Mahrûse-i Galata muzâfâtından kasaba-i Kasımpaşa’da Çatma Mescid Mahallesi’nde sâkine Hadîce bt. Mustafa nâm hatun meclis-i şer‘-i hatîrde umdetü’l-mevâli’l-izâm işbu sahibü’l-vesîka Feyzullah Efendi b. Salahaddin tarafından husûs-ı âti’z-zikre vekîl olup nehc-i şer‘î üzre vekâleti sâbite olan Veli Efendi b. Mehmed mahzarında ikrâr-ı tâm ve takrîr-i kelâm edip akd-i âtî sudûruna değin silk-i mülk-i sahîhimde münselik olup mahalle-i mezbûrede vâki‘ bir tarafdan Mustafa Efendi mülkü ve bir tarafdan Medîne-i Münevvere vakfı menzil ve iki tarafdan tarîk-ı âm ile mahdûd tabaka-i ulyâsında iki bâb oda ve tabaka-i vustâsında iki bâb oda ve bir sofa ve süflâsında bir bâb oda ve bi’r-i mâyı müştemil mülk menzilimi cümle tevâbi‘ ve levâhıkı ile mûmâ-ileyh Feyzu[llah] Efendi’ye üç yüz kıt‘a esedî guruşa tarafeynden îcâb ve kabûlü hâvî bey‘-ı kat‘î ile bey‘ ve teslîm ol dahi iştirâ ve tesellüm ve kabûl eyleyip semeni olan meblağ-ı mezbûr üç yüz guruşu yedinden tamamen ahz ü kabz eyledim ba‘de’l-yevm menzil-i mahdûd-ı mezkûr müvekkil-i mûmâ-ileyh Feyzullah Efendi’nin mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Abdüllatif Efendi b. Mehmed el-imâm, Abdullah Efendi b. Ahmed el-İ[mâ]m, Hasan Efendi b. Bayram, Abulkadir Çelebi b. Muslı, Ahmed Efendi b. Mustafa, Ahmed Çelebi b. Hasan.