Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 198 Hüküm no: 168 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmihan bt. Abdullah ile kocası Mehmed Bey b. Abdullah’ın muhâlaa yoluyla boşandıkları Mahmiye-i İstanbul’da Salmatomruk kurbünde Paşa odaları demekle ma‘rûf odaların birisinde sâkin[e] İsmihan bt. Abdullah nâm hatun zâtını ma‘rifet-i şer‘iye ile ârifân Mehmed Çelebi b. Haydar ve Ahmed Bey b. Piyale nâm kimesneler ta‘rîfleriyle mu‘arrefe oldukdan sonra meclis-i şer‘-i hatîr-i lâzımü’t-tevkīrde zevc-i muhâlı‘ı işbu râfi‘u’l-kitâb Mehmed Bey b. Abdullah nâm kimesne mahzarında bi-tav‘ihâ ikrâr ve takrîr-i kelâm edip mezbûr Mehmed Bey zevcim olup zimmetinde mütekarrir ve ma‘kūdün-aleyh olan iki bin akçe mehr-i müeccelim ve nafaka-i iddet-i ma‘lûmem üzerlerine ve meûnet-i süknâm dahi kendi üzerime olmak üzre zevcim mezbûr Mehmed Bey ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru ba‘de’l-kabûl hukūk-ı zevciyete ve sâir beynimizde cereyân eden ahz ü i‘tâ ve mu‘âmelât-ı şettâya müte‘allika âmme-i da‘vâdan ben mezbûr Mehmed Bey’in zimmetini ibrâ-i âmm-ı kātı‘u’n-nizâ‘ ile ibrâ ve ıskāt edip ol dahi hukūk-ı zevciyete ve cihet-i karz-ı şer‘îden mukaddemâ benden taleb ve da‘vâ eylediği üç bin akçeden ve sâir beynimizde cereyân eden ahz ü i‘tâ ve mu‘âmelât-ı şettâya müte‘allik âmme-i da‘vâdan benim zimmetimi ibrâ-yı âmm-ı kātı‘u’n-nizâ‘la ibrâ ve ıskāt eyledi min-ba‘d her birimizin âhar ile vechen mine’l-vücûh da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâdî ve’l-aşer min-Saferü’l-hayr li’s-seneti’l-mezbûre. Şuhûdü’l-hâl: Mehmed Çelebi b. Haydar, Mehmed Çelebi b. Cafer, Ahmed Bey b. Piyale, Receb Çelebi b. ( ).