Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 198 Hüküm no: 169 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Sinan’ın sahibi olduğu bekâr odalarını Hasan Ağa b. Abdi Çavuş’a sattığı Mahmiye-i İstanbul’da Şehremîni Çarşısı kurbünde sâkin Mustafa Ağa b. Sinan nâm kimesne meclis-i şer‘de mahmiye-i mezbûrede Kâtib Muslihiddin Mahallesi sükkânından hâlâ şâhincibaşı olan umdetü’l-emâcid ve’l-ekârim Hasan Ağa b. Abdi Çavuş tarafından husûs-ı âti’l-beyâna vekîl olduğu Hasan Efendi b. Hüseyin ve İbrahim Bey b. İshak nâm kimesneler şehâdetleri ile şer‘an sâbit olan Muharrem Ağa b. Selim nâm kimesne mahzarında ikrâr ve takrîr-i kelâm edip akd-i âtî sudûruna değin yedimde mülküm ve hakkım olup zikrolunan Kâtib Muslihiddin Mahallesi’nde vâki‘ iki tarafdan müvekkil-i mezbûr Hasan Ağa mülkü ve bir tarafdan Âişe Hatun menzili ve bir tarafdan tarîk-ı âm ile mahdûd olan sekiz bâb mücerredîn odalarını bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık tarafeynden îcâb ve kabûlü hâvî bey‘-ı kat‘î ile on sekiz bin akçeye vekîl-i mezbûr Muharrem Ağa’ya bey‘ ve teslîm ol dahi ber-vech-i muharrer müvekkil-i mezbûr Hasan Ağa için iştirâ ve tesellüm eylediğinden sonra semeni olan meblağ-ı mezbûr on sekiz bin akçeyi vekîl-i mezbûr yedinden tamamen ahz ü kabz eyledim min-ba‘d zikrolunan odalarda alâka ve medhalim kalmayıp müvekkil-i mezbûr Hasan Ağa’nın mülk-i müşterâsı ve hakk-ı sırfı olup keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’[l-yevmi]’s-sânî aşer min-Saferü’l-hayr li’s-seneti’l-mezbûre. Şuhûdü’l-hâl: Ali Efendi b. Süleyman, Lütfullah Çelebi b. Mahmud Efendi, Hamamcı Mahmud Ağa b. Abdullah, Ömer b. Mustafa, İbrahim b. Mustafa, Salih Çelebi b. Mehmed, Şa‘ban Efendi b. Hasan, Mehmed b. Abdullah.