Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 199 Hüküm no: 170 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey b. İsmail’in evini Yusuf b. Mehmed’e sattığı Mahmiye-i İstanbul’da Keçeci Pîrî Mahallesi ahâlîsinden Mustafa Bey b. İsmail meclis-i şer‘-i hatîrde işbu râfi‘u’l-kitâb el-Hâc Yusuf b. el-Hâc Mehmed nâm kimesne mahzarında ikrâr-ı tâm ve takrîr-i kelâm edip silk-i mülkümde münselik olup mahalle-i mezbûrede vâki‘ bir tarafdan Fâtıma Hatun mülkü ve bir tarafdan Kuşakçı Mustafa mülkü ve bir tarafdan ba‘zan Medîne-i Münevvere vakfı menzil ve ba‘zan Müezzin vakfı menzil ve bir tarafdan ba‘zan Beyci vakfı menzil ve ba‘zan tarîk-ı âm ile mahdûd dâhiliyesinde fevkānî iki bâb oda ve iki bâb tahtânî oda ve bir sofa ve bir kiler ve bi’r-i mâ ve cüneyne ve hâriciyesinde bir mikdâr arsayı muhtevî mülk menzilimi cümle tevâbi‘ ve levâhıkı ile mezbûr el-Hâc Yusuf’a kırk bin akçeye tarafeynden îcâb ve kabûlü hâvî bey‘-ı kat‘î ile bey‘ ve teslîm edip ol dahi iştirâ ve tesellüm ve kabûl eylediğinden sonra semeni olan meblağ-ı mezbûr kırk bin akçeyi yedinden tamamen ahz ü kabz eyledim ba‘de’l-yevm menzil-i mahdûd-ı mezbûr merkūm el-Hâc Yusuf’un mülk-i müşterâsıdır keyfe mâ yeşâ’ ve yahtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’s-sânî aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Abdülkadir Efendi b. İsa el-imâm, Mehmed Çelebi b. Mustafa, Mustafa Beşe b. Mehmed, Mehmed Çelebi b. Ahmed, Mehmed Beşe b. Ahmed, Hüseyin Bey b. Muslı.