Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 199 Hüküm no: 171 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. el-Hâc Yusuf b. Abdullah’ın nafaka vermeden terk ettiği iki karısı ve çocukları için nafaka ödemesi Mahmiye-i İstanbul’da Elvanzâde Mahallesi’nde sâkin olup kırk iki aydan beri Malta keferesi yedlerinde esir olan el-Hâc Osman b. Mustafa’nın zevce-i menkûhaları Kerîme bt. Süleyman ve Âişe bt. Abdullah nâm hatunlar meclis-i şer‘-i hatîrde mahmiye-i mezbûrede Unkapanı kurbünde Arabacılar Mahallesi’nde sâkin el-Hâc Yusuf b. Abdullah mahzarında her biri üzerine da‘vâ ve takrîr-i kelâm edip mezbûr el-Hâc Yusuf bizi ve firâşından hâsıl ve bizden mütevellid olup hâlâ hacr ve terbiyemizde olan sagīr oğlu Mustafa ve sagīre kızı Rukiye’yi bilâ-nafaka terk edip nafakaya eşedd-i ihtiyâcımız olmağla mahmiye-i mezbûrede Ahî Çelebi mahkemesinde nâibü’[ş-şer‘i’]ş-şerîf olan Ali Efendi b. Kemâleddin Bey bin doksan senesi Zilhiccesi gurresinde tehâlîf-i şer‘î ile bizi ba‘de’t-tahlîf her birimize yevmî sekizer akçeden cem‘an otuz iki akçe nafaka farz ve takdîr ve istidâne ve sarfa ve mezbûr el-Hâc Osman’a rücû‘a bize izin verip hat ve hatmini hâviye hüccet-i şer‘iye vermişidi merkūm el-Hâc Osman’ın işbu mezkûr el-Hâc Yusuf yedinde bi-tarîkı’l-mudârebe teslîm olunmuş yüz yirmi esedî guruş hakkı olmağın nafaka-i mezkûre-i müstedâneden târih-i kitâba gelince müctemi‘ iki bin dört yüz kırk akçe hâlâ ve fîmâ-ba‘d dahi lâzım gelen mertebeyi ale’l-hesâb bize teslîme tenbîh olunmak matlûbumuzdur deyü merkūm Ali Efendi’nin imzâsıyla mümzât ve hatmiyle mahtûme mazmûnu müsbet bir kıt‘a nafaka-i hüccet ibrâz edip ve yine mahalle-i mezbûre ahâlîsinden olup işbu kitâb-ı müşgîn-nisâb zeylinde muharrerü’l-esâmî olan Müslimîn merkūm el-Hâc Osman’ın târih-i mezkûrdan beri gaybet-i munkatı‘a ile gāib olup hâl bast olunan minvâl üzre olduğunu her biri haber vermeğin gıbbe’s-suâl mezbûr el-Hâc Yusuf dahi gāib-i merkūmun bi-tarîkı’l-mudârebe teslîm olunmuş yedinde hâlâ yüz yirmi esedî guruş olduğunu tav‘an ikrâr ve i‘tirâf etmeğin mûcebiyle nafaka-i müstedâne-i mezkûreden müctemi‘ meblağ-ı mezbûr iki <> bin iki yüz kırk akçeyi hâlâ edâya ve ba‘de’l-yevm dahi istifâ edince nafaka-i mezbûreden müctemi‘ olanını ale’l-hesâb teslîme mezbûr el-Hâc Yusuf’a tenbîh olunup mâ-vaka‘a bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Süleyman Efendi b. Halil, Mehmed b. Mustafa, Musa b. Abdullah, Halil b. Hasan, Mehmed Çelebi b. Haydar, Ahmed Çelebi b. Piyale.