Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 200 Hüküm no: 172 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa b. Abdülbaki’nin evini Hüseyin Bey b. Ahmed’e sattığı Fi’l-asl Vilâyet-i Rumeli’nde Gölükesri kazâsına tâbi‘ Çetrok nâm karye ahâlîsinden olup hâlâ mahmiye-i İstanbul’da Ayasofya-i Kebîr Câmi‘-i Şerîfi kurbünde sâkin Hasan Ağa b. Abdülbaki nâm kimesne tarafından husûs-ı âti’z-zikri ikrâra vekîl olup Hüseyin b. Abdülbaki ve Mehmed b. Ali şehâdetleri ile şer‘an vekâleti sâbite olan Teberdâr-ı Hâssa Mehmed Bey b. Ali meclis-i şer‘-i şerîf-i enverde işbu râfi‘u’l-kitâb Hüseyin Bey b. Ahmed nâm kimesne mahzarında ikrâr ve takrîr-i kelâm edip müvekkilim mezbûr Hasan Ağa’[nın] silk-i mülkünde münselik olup vilâyet-i mezkûrede kasaba-i Kesriye mahallâtından Câmi‘-i Cedîd Mahallesi’nde vâki‘ bir tarafdan Kādı Mustafa Efendi mülkü ve bir tarafdan Hatîb Lütfullah Efendi mülkü ve bir tarafdan cidâr-ı hısn ve bir tarafdan tarîk-ı hâs ile mahdûd tahtânî üç bâb oda ve ahır ve kiler ve bahçe ve iki fırın ve bi’r-i mâyı müştemil mülk menzilini bi-cümleti’t-tevâbi‘ ve’l-levâhık mezbûr Hüseyin Bey’e tarafeynden îcâb ve kabûlü hâvî bey‘-ı bâtt-ı sahîh-i şer‘î ile elli esedî guruşa bey‘ ve temlîk ol dahi ber-vech-i muharrer iştirâ ve kabûl ve temellük eylediğinden sonra semeni olan meblağ-ı mezbûr elli beş esedî guruşu mezbûr Hüseyin Bey yedinden tamamen alıp kabz edip menzil-i mahdûd-ı mezbûru mahâllinde zabt ve tasarrufa mezbûru taslît eyledi fîmâ-ba‘d menzil-i mahdûd-ı mezkûr mezbûr Hüseyin Bey’in mülk-i müşterâsı olmuşdur keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferü’l-hayr li’s-seneti’l-mezbûre. Şuhûdü’l-hâl: Hüseyin Ağa b. Şeyh Mehmed, Hüseyin b. Abdülbaki, Mehmed b. Hasan, Topal Hüseyin, İbrahim b. Hüseyin, Osman b. Hüseyin.