Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 201 Hüküm no: 173 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Yanaki v. Yorgi’nin Mehmed Çelebi b. İbrahim’e olan borcunun terekesinden ödenmesi Mahmiye-i İstanbul’da Hoca Rüstem Mahallesi’nde sâkin işbu bâ‘isü’l-kitâb Mehmed Çelebi b. İbrahim meclis-i şer‘-i hatîr-i lâzımü’t-tevkīrde mahrûse-i İzmir’de Kasab İlyas Mahallesi ahâlîsinden olup mahmiye-i mezbûrede Vezîrhanı’nda ticâret üzre iken bundan akdem hâlik olan Telbisoğlu demekle ma‘rûf Yanaki v. Yorgi’nin verâseti anası Mared bt. Katnasi ile sulbî sagīr oğlu Yorgaki ve sagīre kızları Sofya ve Todora’ya münhasıra olduğu şer‘an zâhir ve müte‘ayyin oldukdan sonra mezbûre Mared’in vekîl-i müsecceli ve sıgār-ı mezkûrûnun tesviye-i emirleri için savb-ı şer‘-i hatîrden mansûb vasîleri olduğu yedinde olan vekâlet ve vesâyet hüccetleri nâtıka olduğu üzre şer‘an zâhir ve müte‘ayyin olmağla hâlik-i mezbûrun terekesine vâzı‘u’l-yed olan Mihal v. Ahnas nâm zimmî muvâcehesinde üzerine da‘vâ ve takrîr-i kelâm edip mezbûr Yanaki’ye bin doksan senesi Şa‘bâni’l-mu‘azzamının yirmi beşinci günü hâl-i sıhhatinde sâkin olduğum menzilimde dört yüz esedî guruş olmak üzre on altı bin para-i Mısrî ikrâz ve teslîm ol dahi iktirâz ve kabz ve kendi mesârifine sarfla istihlâk edip kable’l-edâ hâlik olup tereke-i vâfiyesine mezbûr Mihal ber-vech-i mezkûr vaz‘-ı yed etmeğin suâl olunup terekesinden meblağ-ı mezbûrun alıverilmesi matlûbumdur dedikde gıbbe’s-suâl mezbûr Mihal cevâbında fi’l-hakīka hâlik-i mezbûrun tereke-i vâfiyesine vaz‘-ı yedini ikrâr lâkin deyn-i mezbûru bi’l-külliye inkâr edicek müdde‘î-i mezbûrdan müdde‘âsına beyyine taleb olundukda udûl-i Müslimînden olup Tophâne’de Kal‘a Kapısı Mahallesi’nde sâkin Ali Çelebi b. Ahmed nâm kimesne ile Cibali Kapısı hâricinde sâkin Küçük Hamon cemâ‘atinden Foyozte v. Rafael ve Kamal v. Elimerte nâm Yahûdiler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ müdde‘î-i mezbûr Mehmed Çelebi sene-i mezkûre Şa‘banının yirmi beşinci günü mezbûr Telbisoğlu Yanaki v. Yorgi’ye hâl-i sıhhatinde kendi sâkin olduğu menzilinde dört yüz esedî guruş olmak üzre on altı bin para-i Mısrî ikrâz ve teslîm ol dahi bizim huzûrumuzda iktirâz ve kabz ve kendi mesârifine sarfla istihlâk eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde mezbûr dahi ta‘dîl ve tezkiye için savb-ı şer‘den irsâl olunan Mustafa Efendi b. Abdülaziz evvelâ Tophâne’de mahalle-i mezbûra varıp ahâlîsinden Mehmed Beşe b. Abdullah ve Salih b. Mustafa ve Hüseyin b. İsa ve Bayram b. Yakub ve el-Hâc Ahmed b. Sinan ve Mustafa Bey b. Ahmed ve Mustafa b. Mahmud ve Mehmed Beşe b. Ahmed ve Şa‘ban b. Aydın nâm kimesnelerden mezbûr Ali Çelebi’nin keyfiyet-i hâlini suâl etdikde mezbûr adl ve makbûlü’ş-şehâde olduğunu her biri haber verdiklerinden sonra zikrolunan Cibali Kapısına varıp anda sâkin Yeşua v. İsak ve Avraham [nâm] Yahûdilerden mezbûrân Foyozte ve Kamal’in keyfiyet-i hâllerini istifsâr etdikde mezbûrûnun her biri şâhidân-ı merkūmânı makbûlü’ş-şehâdelerdir deyü haber verdiklerini merkūm Mustafa Efendi mahâllinde tahrîr ma‘an ba‘s olunan Abdullah b. Abdurrahman ile meclis-i şer‘a gelip alâ-vukū‘ihî inhâ ve takrîr etmeğin emr-i ta‘dîl ve tezkiye ve şehâdetleri makbûle oldukdan sonra meblağ-ı mezbûru merkūm Yanaki’den hayatında küllen ve ba‘zan ahz ü kabz veyâ âhara havâle etmeyip ve’l-hâsıl vücûh-ı şer‘iyeden bir vechile zimmetini ibrâ etmediğine merkūm Mehmed Çelebi’ye yemîn teklîf olundukda ol dahi hasbe’l-mesûl [yemîn] billâhi te‘âlâ etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Hasan Çelebi b. Fazlullah el-Mübâşir, Mehmed Efendi b. Mustafa, Mehmed Çelebi b. Piyale, Ahmed Çelebi b. Haydar, Ebûbekir Efendi b. Abdullah.