Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 202 Hüküm no: 174 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Mahmud Çavuş’un mütevelliye olduğu vakfın kaymakamı Hasan Ağa’dan alacağı olmadığını beyan ettiği Dârü’l-hilâfeti’l-aliyye Kostantıniyye el-mahmiye’de Şehremîni kurbünde vâki‘ ashâb-ı hayrâtdan merhûm Kürkçü paşa [başı] Şemseddin Ahmed Bey’in evlâdından olmağla vakfına meşrûtiyet üzre mütevelliyesi olan Âişe bt. Mahmud Çavuş nâm hatun zâtını ma‘rifet-i şer‘iye ile ârifân olan yine Kürkçübaşı Mahallesi’nde sâkin İ[mâ]m Mustafa Efendi b. Şa‘ban [ve] Mehmed Çelebi b. Mustafa Efendi ta‘rîfleriyle mu‘arrefe oldukdan sonra meclis-i şer‘-i şerîf-i enver ve mahfil-i dîn-i münîf-i ezherde umûr-ı tevliyetde berat-ı şerîf-i âlî-şân ile kāimmakāmı olan işbu sahibü’l-kitâb zahru’l-eşbâh el-Hâc Hasan Ağa b. Ahmed mahzarında bi-tav‘ihâ ikrâr-ı tâm ve takrîr-i kelâm edip vâkıf-ı müşârün-ileyhin evkāfı müstegallâtından hâsıla olan icârâtının vakfiye-i ma‘mûlün-bihâsında ta‘yîn olunan masrafdan fazlası evlâdına meşrûta ve ben evlâdiyet ve meşrûtiyet üzre vakf-ı mezbûra [44a] mütevelliye ve ber-mûceb-i şart-ı vâkıf fazla mesârife müstahıkka ve merkūm el-Hâc Hasan Ağa bin seksen bir senesinden beri umûr-ı tevliyetde kāimmakāmım olmağla her senede mezbûrun muhâsebesini görüp ba‘de’l-mesârif bana âide olan mertebe meblağı yedinden ahz ü kabz ve tesellüm eyledim târih-i kitâba gelince olan hesâbımdan merkūm el-Hâc Hasan Ağa yedinden zimmetinde bir akçe ve bir habbe [bâkī] kalmayıp mezbûr ile bi-vechin mine’l-vücûh da‘vâ ve nizâ‘ım kalmamışdır dedikde gıbbe’t-tasdîk mâ-hüve’l-vâki‘ bi’t-taleb ketb olundu. Fi[‘l-yevmi]’s-sâmin min-Saferü’l-hayr li-sene ihdâ ve tis‘în ve elf. Şuhûdü’l-hâl: Mustafa Efendi b. Şa‘ban, Abdullah Ağa b. Mustafa Efendi, Mustafa Çelebi b. el-Hâc Mahmud, Kayyım Hüseyin b. Eyüb, Mehmed Çelebi b. Mustafa Efendi.