Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 203 Hüküm no: 175 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülaziz Efendi b. Mustafa Efendi ile Salih Ağa b. Osman Ağa’nın alacak davasında sulh oldukları Fi’l-asl Vilâyet-i Anadolu’da Bolu Sancağı’nda Mengen kazâsına tâbi‘ Karacalar nâm karye sükkânından olup hâlâ mahmiye-i İstanbul’da Mehmed Ağa Câmi‘-i Şerîfi kurbünde müsâfiren sâkin olan umdetü’l-kuzât Abdülaziz Efendi b. Mustafa Efendi mahfil-i kazâda bin doksan senesinde Bolu mütesellimi olan işbu hâfızu hâze’l-kitâb Salih Ağa b. Osman Ağa nâm kimesne mahzarında ikrâr ve takrîr-i kelâm edip mezbûr Salih Ağa târih-i mezbûrede sancak-ı mezbûr mütesellimi iken senin oğlun gāib ani’l-meclis Abdülvehhab Efendi nâm kimesne karye-i mezbûrede bir avratı darb etti deyü benden cerîme nâmıyla yüz yetmiş esedî guruşumu ahz ü kabz ve mesârifine sarfla istihlâk etmekle ben-dahi meblağ-ı mezbûr yüz yetmiş guruşu mezbûr Salih Ağa’dan bundan akdem da‘vâ ve taleb eylediğimde ol dahi bi’l-külliye inkâr etmekle ben-dahi müdde‘âmı vech-i şer‘î üzre isbât sadedinde iken beynimizde münâza‘ât-ı kesîr[e] vâki‘ olmuşidi el-hâletü hâzihî beynimize muslihûn tavassut edip da‘vâ-yı mezbûremden beni mezbûr Salih Ağa ile beynimizde kırk esedî guruş üzerine inşâ-i akd-i sulh eylediklerinde ben-dahi sulh-i mezbûru kabûl ve bedel-i sulh olan meblağ-ı mezbûr kırk esedî guruşu mezbûr Salih Ağa yedinden tamamen ahz ü kabz eylediğimden sonra meblağ-ı bâkī yüz otuz esedî guruşa müte‘allika da‘vâdan ben mezbûr Salih Ağa’nın zimmetini ibrâ-i âmm-ı kātı‘u’l-hisâm ile ibrâ ve ıskāt edip mezbûr Salih Ağa dahi bedel-i sulh olan meblağ-ı mezbûr kırk esedî guruşa müte‘allika da‘vâdan benim zimmetimi ibrâ-i âmm-ı kātı‘u’n-nizâ‘la ibrâ ve ıskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: es-Seyyid Mehmed Efendi b. Mansur Efendi, İshak Efendi b. Yusuf, Mehmed Efendi b. Gazanfer, Ali Efendi b. el-Hâc Mehmed, Ahmed Efendi b. Mehmed.