Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 205 Hüküm no: 178 Orijinal metin no: [44b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdüllatif Çelebi b. Murtaza’nın vefat eden Ali Çelebi b. Mustafa’da olan alacağı konusunda vârisleriyle sulh olduğu Mahmiye-i İstanbul’da Çerâğī Hamza Mahallesi sükkânından Abdüllatif Çelebi b. Murtaza nâm kimesne tarafından husûs-ı âti’l-beyâna vekîl olduğu Şa‘ban b. İbrahim ve Süleyman b. Abdullah nâm kimesneler şehâdetleri ile şer‘an sâbit olan Mustafa Efendi b. Abdülbaki nâm kimesne meclis-i şer‘-i hatîr-i lâzımü’t-tevkīrde Ali Paşa-yı Atîk Mahallesi’nde sâkin iken bundan akdem vefât eden Ali Çelebi b. Mustafa’nın verâseti zevce-i metrûkesi Şerife Âişe bt. Ahmed’e ve sulbiye kebîre kızı Şerife Fâtıma’ya ve sulbî sagīr oğlu es-Seyyid Mustafa’ya münhasıra olduğu şer‘an sâbit ve zâhir oldukdan sonra tereke-i müteveffâ-yı mezbûra vâzı‘u’l-yed olan zevcesi mezbûre Şerife Âişe ile sagīr-i mezbûrun kıbel-i şer‘den mansûb vasîsi ve mezbûre Şerife Fâtıma tarafından husûs-ı âti’l-beyâna vekîl olduğu mezbûre Şerife Fâtıma’nın zâtını ma‘rifet-i şer‘iye ile ârifân el-Hâc Hüseyin b. Ramazan ve diğer el-Hâc Hüseyin [b.] Nasuh nâm kimesneler şehâdetleri ile şer‘an [sâ]bit [45a] olan zevci Şâtır Mustafa Bey b. Ahmed nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr Abdüllatif Çelebi’nin müteveffâ-yı mezbûr Ali Çelebi zimmetinde cihet-i karz-ı şer‘îden elli esedî guruş hakkı olmağla meblağ-ı mezbûru kable’l-edâ merkūm Ali Çelebi vefât edip zimmetinde kalmağın meblağ-ı mezbûru müteveffâ-yı mezbûrun verese-i mezbûresinden da‘vâ ve taleb eylediğimde onlar dahi meblağ-ı mezbûru bi’l-külliye inkâr etmeleriyle ben-dahi meblağ-ı mezbûru şühûd-ı udûlle verese-i mezbûre muvâcehelerinde isbât etmem mukarrer oldukdan sonra verese-i mezbûre ile beynimize muslihûn tavassut edip sulh sagīr-i mezbûr hakkında enfa‘ olmağın da‘vâ-yı mezbûreden beni verese-i mezbûre ile beynimizde on esedî guruş üzerine inşâ-i akd-i sulh ettiklerinde ben-dahi bi’l-vekâle sulh-i mezbûru kabûl edip bedel-i sulh olan meblağ-ı mezbûr on esedî guruşu verese-i mezbûre yedinden tamamen ahz ü kabz eylediğimden sonra meblağ-ı bâkī kırk esedî guruşa müte‘allika âmme-i de‘âvî ve mutâlebâtdan verese-i mezbûrenin zimmetlerini ibrâ-yı âmm-ı kātı‘u’n-nizâ‘la bi’l-vekâle ibrâ ve ıskāt eyledim dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: el-Hâc Ahmed Çelebi b. Abdullah Efendi, İbrahim Çelebi b. Osman, Hacı Sadi b. Polad, Yusuf Bey b. Abdullah.