Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 208 Hüküm no: 181 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahmud b. Mehmed’in Süleyman Çelebi b. Ahmed’deki alacağını teslim aldığı Havâss-ı Refî‘a muzâfâtından Çatalca nâhiyesine tâbi‘ Halkalı nâm karye sükkânından Mahmud b. Mehmed nâm kimesne meclis-i şer‘-i şerîf-i enverde işbu bâ‘isü’l-kitâb karındaşı oğlu Süleyman Çelebi b. Ahmed mahzarında ikrâr-ı tâm ve takrîr-i kelâm edip mezbûr Süleyman Çelebi’nin oğlum gāib ani’l-meclis Osman nâm kimesne zimmetinde cihet-i deyn-i şer‘îden üç yüz esedî guruş hakkı olup mezbûr Süleyman Çelebi mâlından bana yüz elli kıt‘a esedî guruş ver merkūm Osman meblağ zimmetinde olan hakkımdan sana edâ ve teslîm etmezse ben yine sana tamamen edâ ve teslîm edeyim demekle ben-dahi ber-vech-i meşrûh mezbûr Süleyman Çelebi’ye mâlımdan yüz elli esedî guruş vermişidim lâkin mezbûr Osman meblağ-ı mezbûru bana edâ ve teslîm [etme]mekle merkūm Süleyman Çelebi’ye mürâca‘at edip vech-i meşrûh üzre medfû‘um olan meblağ-ı mezbûr yüz elli esedî guruşu bi’t-tamam ahz ü kabz ve tesellüm eyledim meblağ-ı mezbûrdan mezkûr Süleyman Çelebi’de bir akçe ve bir habbe kalmamışdır dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Ali Dede b. ( ), Yusuf Ağa b. ( ), Mustafa Beşe b. ( ), Hasan b. Ömer, Mehmed Çelebi b. Berber, Çorbacızâde b. ( ).