Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 209 Hüküm no: 182 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Abdullah’ın muhâlaa yoluyla boşandığı Mehmed b. Ahmed’e olan borcunu ödemesi Mahmiye-i İstanbul’da Ağa Çayırı kurbünde İskender Ali Mahallesi sükkânından râfi‘u hâzihi’l-vesîka Mehmed b. Ahmed meclis-i şer‘-i hatîr-i lâzımü’t-tevkīrde muhâla‘un-bihâ Rahime bt. Abdullah nâm hatun mahzarında üzerine da‘vâ ve takrîr-i kelâm edip mezbûre Rahime ile beynimizde zevciyet kāime iken kendi mâlımdan emri ile üzerine deyn olmak üzre her çifti sekizer esedî guruşa dört çift Bursa yasdığı ve ikişer esedî guruşa iki yemenî döşek yüzleri ve iki guruşa bir peçe ve bir buçuk guruşa bir üstlük cem‘an otuz dokuz buçuk guruşa eşyâ-i mezkûreyi mezbûre Rahime için iştirâ edip teslîm eylediğimden sonra eşyâ-i mezkûre semeni olan meblağ-ı mecmû‘-ı mezbûr otuz dokuz buçuk guruş mezbûre Rahime zimmetinde kalmağla hâlâ taleb ederin suâl olunup alıverilmesi matlûbumdur dedikde gıbbe’s-suâl mezbûre Rahime cevâbında fi’l-hakīka vech-i muharrer üzre eşyâ-i mezkûreyi emri ile kendi için alıverip ve eşyâ-i mezkûreyi kendüye teslîm ol dahi kabz etdiğini ikrâr lâkin semeni olan meblağ-ı mecmû‘-ı mezbûr otuz dokuz buçuk guruşu bi’t-tamam merkūm Mehmed’e edâ eyledim deyü def‘le mukābele edicek gıbbe’l-istintâk ve akībe’l-inkâr mezbûre Rahime’den def‘-i mezkûrunu mübeyyine beyyine taleb olundukda ityân-ı beyyine için istimhâl edip iki def‘a mehl-i şer‘î ile imhâl olundukdan sonra ityândan izhâr-ı acz ile istihlâf etmeğin mezbûr Mehmed’e ber-vech-i muharrer mezbûre Rahime için iştirâ ediverdiği eşyâ-i mezkûrenin semeni olan meblağ-ı mecmû‘-ı mezbûr otuz dokuz buçuk guruşu mezbûre Rahime yedinden ahz ü istifâ etmediğine yemîn teklîf olundukda ol dahi alâ-vâcibü’l-mesûl yemîn billâhi’l-aliyyü’l-a‘lâ etmeğin meblağ-ı mezbûr otuz dokuz buçuk guruşu merkūm Mehmed’e edâ ve teslîme mezbûre Rahime’ye tenbîh birle mâ-hüve’l-vâki‘ bi’t-taleb ketb olundu. Fi’l-yevmi’s-sâlis aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Mehmed Çelebi [b.] Piyale, Ahmed Çelebi b. Cafer, Ahmed Çelebi b. Piyale.