Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 213 Hüküm no: 185 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ahmed Paşazâde Mehmed Paşa’nın zevcesi Lütfullah bt. Abdullah’ın terekeden kendisine isabet eden hisseden, merhumun oğlu Ahmed Bey’den aldığı bir miktar para ve eşya karşılığında feragat ettiği Cezîre-i Girid’de medîne-i Hanya’da sâkin iken bundan akdem maktûlen vefât eden Ahmed Paşazâde Mehmed Paşa’nın verâseti zevceteyn-i metrûketeyni Lütfullah bt. Abdullah ve Âişe bt. Üveys nâm hatunlara ve sulbî kebîr oğulları Ahmed Bey ve Mustafa Bey ve Hasan Bey’e ve sulbiye kebîre kızları Ümmühani ve Fâtıma ve Rukiye’ye münhasıra olduğu şer‘an sâbit oldukdan sonra zâtı Hüseyin b. Hasan ve İbrahim Çavuş b. Mehmed ta‘rîfleriyle mu‘arrefe olan mezbûre Lütfullah meclis-i şer‘-i hatîrde tereke-i müteveffâ-yı mezbûra vâzı‘u’l-yed olan işbu râfi‘u’l-kitâb mezbûr Ahmed Bey mahzarında ikrâr ve takrîr-i kelâm edip zevcim mezbûr Mehmed Paşa’nın akār ve menkūl ve nukūd ve bi’l-cümle ism-i mâl ıtlâk olunur cümle-i terekesinden bi’l-irsi’ş-şer‘î bana isâbet ve intikāl eden nısf-ı sümün hisse-i şer‘iyem mukābelesinde mezkûr Ahmed Bey bana bi-tarîkı’s-sulh ve’t-tehârüc yüz elli esedî guruş ile elli esedî guruş kıymetli yirmi zirâ‘ telli hatâyî kumaş def‘ ü teslîm ben-dahi ber-vech-i muharrer ahz ü kabz ve tesellüm eyleyip müteveffâ-yı mezbûrun cümle-i terekesine müte‘allika âmme-i de‘âvî ve mutâlebâtdan mezkûr Ahmed Bey’in ve sâir veresesinin zimmetlerini ibrâ-yı âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb [ketb] olundu. Fî 13 min-Safer li-sene 1091. Şuhûdü’l-hâl: Hüseyin Efendi b. Mustafa, Abdullah Efendi b. İbrahim, Kâtibzâde Ali Efendi, Mehmed Efendi b. Mahmud, Abdi Çelebi b. Ahmed, Yusuf b. Receb, Hasan Çelebi b. Mehmed, Ali Çavuş, es-Seyyid İbrahim Ağa b. Mahmud, Ahmed Çelebi b. Hüseyin Efendi.