Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 213 Hüküm no: 186 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanaki v. Nikola’nın evini Mehmed Ağa b. Mehmed’e sattığı Mahmiye-i İstanbul’da Çakır Ağa Mahallesi’nde sâkin Yanaki v. Nikola nâm zimmî meclis-i şer‘-i hatîr-i enverde işbu râfi‘u’l-kitâb Mehmed Ağa b. Mehmed tarafından ikrâr-ı âti’z-zikri tasdîka vekîl olup bimâ-hüve nehcü’s-sübût şer‘an vekâleti sâbite ola[n] Mustafa Efendi b. Durak el-imâm mahzarında ikrâr ve takrîr-i kelâm edip akd-i âtî sudûruna değin silk-i mülkümde münselik olup mahalle-i mezbûrede vâki‘ bir tarafı el-Hâc İsmail mülkü ve bir tarafı Kanilo mülkü ve bir tarafı Bandağ mülkü ve bir tarafı tarîk-ı âm ile mahdûd bir tahtânî oda ve bir sofa ve muhavvâta ve kenîfi muhtevî mülk menzilimi bi-cümleti’t-tevâbi‘ ve’l-levâhık mezbûr Mehmed Ağa’ya altı bin altı yüz akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ ve temlîk ve teslîm ol dahi iştirâ ve kabûl ve temellük ve tesellüm eylediğinden sonra semeni olan meblağ-ı mezbûr altı bin altı yüz akçeyi mezbûr Mehmed Ağa yedinden alıp kabz eyledim ba‘de’l-yevm menzil-i mezbûr mesfûr Mehmed Ağa’nın mülk-i müşterâsıdır keyfe mâ yeşâ’ mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’r-râbi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: İsmail Efendi b. Süleyman, Ahmed Çelebi b. Derviş, Mustafa Çelebi b. Ali, el-Hâc Murad el-Meyâdî [el-münâdî], Abdülkerim el-kayyûm, el-Hâc Mehmed b. Ahmed.