Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 214 Hüküm no: 187 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Ali’nin, vefat edip terekesi beytülmala kalan Dahkî Mustafa Efendi’deki alacağının beytülmaldan verilmesi Efendi hazretlerinin imzâsıyladır Mahmiye-i İstanbul’da Azebler Mahallesi’nde sâkin bâ‘isü hâze’l-kitâb Mehmed b. Ali Dîvân-ı Hümâyûn-ı devlet-meşhûnda ma‘kūd meclis-i şer‘-i şerîfde mahmiye-i mezbûrede Şeyh Ebulvefâ Câmi‘-i Şerîfi kurbünde vâki‘ Mollagürânî Mahallesi’nde sâkin iken bundan akdem vedâ‘-ı âlem-i fânî eden merhûm Dahkî Mustafa Efendi b. Mirza’nın zâhirde vâris-i ma‘rûfu olmayıp terekesi beytü’l-mâle âide olmak ile tereke-i müteveffâ-yı mezbûra bi’l-emâne vâzı‘u’l-yed olup bi’l-fi‘il şıkk-ı evvel defterdârı olan câmi‘ü’l-emvâli’s-Sultâniye âmirü’l-hazâini’l-Osmâniye zü’l-kadri’r-râsih ve’ş-şerefi’ş-şâmih Hasan Efendi tarafından husûs-ı âti’z-zikre vekîl-i sâbitü’l-vekâlesi ve hâlâ başbâkīkulu olan umdetü’l-emâcid ve’l-a‘yân es-Seyyid Mehmed Ağa mahzarında üzerine da‘vâ ve takrîr-i kelâm edip mezbûr Dahkî Mustafa Efendi zimmetinde hâl-i hayatında kendüye bey‘ ve teslîm ol dahi iştirâ ve kabz eylediği beynimizde ilm-i şer‘î ile [ma‘lûm] bakır evânîsi semenlerinden otuz esedî guruş hakkım olup meblağ-ı mezbûrdan altı esedî guruşunu bana edâ ve teslîm ben-dahi ahz ü kabz edip yirmi dört esedî guruşum bâkī kalıp hatta merkūm Mustafa Efendi hâl-i marazında cihet-i mezkûreden bana ol mikdâr deyni olduğunu şuhûd mahzarında ikrâr ve işhâd dahi edip kable’l-edâ fevt olup tereke-i vâfiyesi minvâl-i muharrer [üzre] kabz olunmağın suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr es-Seyyid Mehmed Ağa cevâbında fi’l-hakīka müvekkil-i müşârün-ileyhin bâlâda tafsîl olunan minvâl üzre tereke-i vâfiye-i müteveffâ-yı mezbûra vaz‘-ı yedini bi’l-vekâle ikrâr lâkin deyn-i mezbûru bi’l-külliye inkâr edicek müdde‘î-i mezbûrdan müdde‘âsına beyyine taleb olundukda yine mahalle-i mezbûrede sâkin udûl-i ahrâr-ı Müslimînden Abdüllatif b. Abdullah ve Receb b. Abdullah nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ müteveffâ-yı mezbûr Dahkî Mustafa Efendi bundan akdem hâl-i hayatında müdde‘î-i mezbûra mukaddemâ yedinden iştirâ ve kabz eylediği beynlerinde ma‘lûm bakır evânîsi semenlerinden müdde‘î-i mezbûrun kabzını i‘tirâf eylediği altı guruşdan mâ‘adâ yirmi dört esedî guruş zimmetinde lâzımü’l-edâ deyni olduğunu bizim huzûrumuzda ikrâr ve i‘tirâf eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle oldukdan sonra meblağ-ı bâkī-i mezbûr müteveffâ-yı mezbûrdan küllen ve ba‘zan ahz ü kabz veyâ hîbe veyâ âhara havâle etmeyip vücûh-ı şer‘iyeden bir vechile zimmetini ibrâ etmediğine mezbûr Mehmed’e yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Umdetü’l-emâcid ve’l-a‘yân Mehmed Ağa, Ahmed Çelebi b. Abdurrahman, Mehmed Çelebi b. Haydar.