Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 215 Hüküm no: 188 Orijinal metin no: [47b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Abdullah’ın vakfettiği evin vakfiye gereği seyyidlerden Ali Çavuş b. Mustafa’ya verildiği Dârü’l-hilâfeti’l-aliyye Kostantıniyye el-mahmiye’de Hoca Üveys Mahallesi’nde vâkı‘a Âişe Hatun bt. Abdullah nâm sahibetü’l-hayrın süknâsını evvelen kendi nefsine ba‘dehâ Şerif Mehmed Efendi b. Receb Efendi’ye ba‘dehû evlâdına evlâd-ı evlâdına ve ba‘de’l-inkırâz sâdât-ı kirâm-ı zevi’l-ihtirâmdan meskene muhtâc bir recül-i sâlihe şart ve ta‘yîn vakfiye-i ma‘mûlün-bihâsında tasrîh ve tebyîn eylediği lede’l-ahâlî ve’l-cîrân ma‘lûmü’l-hudûd iki beyt-i ulvî ve bir beyt-i süflî ve muhavvâta ve bi’r-i mâ ve kenîfi müştemile menzile ber-mûceb-i vakfiye mutasarrıfa olan merkūm Mehmed Efendi’nin sulbiye kızı Hadîce fevt olup merkūm Mehmed Efendi’nin evlâdı münkariz ve işbu râfi‘u’l-kitâb es-Seyyid Ali Çavuş b. Mustafa sâdât-ı kirâmdan olup meskene muhtâc olmağın kitâb-ı müşgîn-nikāb tevkī‘-i refî‘-i müstetâbı ile şeref-yâb olan hâkim-i ma‘delet-nisâb -tûbâ-lehû ve hüsnü-meâb- hazretleri menzil-i mezkûru ber-mûceb-i şart-ı vâkıf mezbûr es-Seyyid Ali Çavuş’a tevcîh buyurdukda tasarrufu için işbu vesîka bi’t-taleb ketb olundu. Fi’l-yevmi’l-âşir min-Saferü’l-hayr li-sene ihdâ ve tis‘în ve elf. Şuhûdü’l-hâl: Ahmed Efendi b. ( ), umdetü’l-eşbâh el-Hâc Kemâleddin Ağa b. Müyesser, Musa Efendi b. ( ), Mehmed Çelebi b. Haydar, Sahhâf İsmail Çelebi b. İbrahim.