Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 217 Hüküm no: 190 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veznedar Kenan b. Abdullah’ın mukataa ödemesiyle ilgili meblağı Receb b. Halil’e teslim etmesi Mahmiye-i İstanbul’da Lâleliçeşme kurbünde Mesih Paşa Mahallesi’nde sâkin işbu râfi‘u’l-kitâb Receb b. Halil nâm kimesne Dîvân-ı Hümâyûn-ı şevket-makrûnda ma‘kūd meclis-i şer‘-i şerîfde yine mahmiye-i mezbûrede Meydâncık nâm mahâlde sâkin Veznedâr el-Hâc Kenan b. Abdullah mahzarında üzerine da‘vâ ve takrîr-i kelâm edip bin seksen üç senesinde Vilâyet-i Rumeli’nde vâki‘ Kili mukāta‘ası iltizâmımda olmağla mukāta‘a-i mezkûre mâlından cânib-i mîrîye tâmmü’l-vezn bin yüz riyâl guruş deynim için kabza me’mûr olanlara teslîm ve teslîm-i mezbûra mahsûb ettirmek üzre gāib ani’l-meclis Veznedâr Cafer yediyle merkūm el-Hâc Kenan’a bin iki yüz yirmi esedî guruş irsâl ve teslîm merkūm el-Hâc Kenan dahi ber-vech-i meşrûh ahz ü kabz etmiş-iken meblağ-ı mezbûrdan ancak dört yüz yetmiş iki esedî ve iki sülüs guruşu deynimden ol mikdâra mahsûb olmak üzre cânib-i mîrîye teslîm edip mâ‘adâ yedi yüz kırk yedi esedî ve bir sülüsü kendi mesârifine sarfla istihlâk etmeğin suâl olunup meblağ-ı mezbûr yedi yüz kırk yedi esedî guruş ve bir sülüsün alıverilmesi matlûbumdur dedikde gıbbe’s-suâl mezbûr Kenan cevâbında fi’l-hakīka müdde‘î-i mezbûrun gāib-i mezkûr Cafer yediyle irsâl eylediği meblağ-ı mezbûr bin iki yüz yirmi esedî guruşu kabz ve meblağ-ı mezbûrdan ol mikdâr deyne mahsûb olmak üzre mîrîye teslîm eylediği meblağ-ı mesfûr dört yüz yetmiş iki esedî ve bir sülüsden mâ‘adâ yedi yüz kırk yedi esedî ve bir sülüsü kendi mesârifine sarfla istihlâk eylediğini ikrâr lâkin müdde‘î-i mezbûr mukaddemâ mukāta‘a-i mezkûreyi iltizâm etdikde kalemiyesine teslîm için benden bin yüz tâmmü’l-vezn riyâl istikrâz ve kabz ve meblağ-ı mezbûra merkūm Cafer emriyle kefîl olmağla meblağ-ı bâkī-i mezbûru deyn-i mezbûrdan ol mikdâra mahsûb ederin deyü def‘le mukābele edicek gıbbe’l-istintâk ve’l-inkâr mezbûr el-Hâc Kenan’dan def‘-i meşrûhuna beyyine taleb olundukda ityân-ı beyyineden izhâr-ı acz ve istihlâf edicek fi’l-hakīka mukāta‘a- mezkûreyi iltizâm etdikde kalemiyesine teslîm için merkūm el-Hâc Kenan’dan bin yüz tâmmü’l-vezn riyâl guruş istikrâz etmeyip ol vech ile edâsı lâzım deyni olmadığına merkūm Receb’e yemîn teklîf olundukda ol dahi hasbe’l-mesûl yemîn billâhi te‘âlâ etmeğin mûcebiyle ba‘de’l-hükm meblağ-ı mezbûr yedi yüz kırk yedi esedî ve sülüs guruşu müdde‘î-i mezbûra red ve teslîme mezbûr el-Hâc Kenan’a tenbîh olunup mâ-vaka‘a bi’t-taleb ketb olundu. Fi’l-yevmi’s-sâlis aşer min-Saferü’l-hayr li’s-seneti’l-mezbûre. Şuhûdü’l-hâl: Yeğen Ahmed Ağa Selâm Çavuşu, el-Hâc Mehmed Çavuş b. ( ), Hasan Bey b. Osman, Osman b. Hamza, Osman Ağa b. ( ). Mezbûr (...) Bey işbu hüccetde (...) oluna yedi yüz kırk yedi (...) altı yüz (...) mukāta‘a-i mezkûre kalemiyesine vereceğini (...) ve bâkī yüz kırk yedi guruşu kabz ve cemî‘ da‘vâdan ibrâ edip hüccet dahi tahrîr olunmuşdur. Mühür