Rumeli Sadâreti Mahkemesi 127 Numaralı Sicil (H. 1090-1091 / M. 1679-1680) cilt: 55, sayfa: 218 Hüküm no: 191 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa’nın Süleyman b. Abdullah’a olan borcunu ödemesi Mahmiye-i İstanbul’da Edirnekapısı kurbünde sâkin işbu bâ‘isü’l-kitâb Süleyman b. Abdullah meclis-i şer‘de yine mahmiye-i mezbûrede el-Hâc Küçük Mahallesi’nde sâkin es-Seyyid Mehmed b. es-Seyyid Mustafa mahzarında üzerine da‘vâ ve takrîr-i kelâm edip ben bundan akdem Çorlu kasabasında sâkin Dimitri nâm zimmînin menzilinde mezbûr es-Seyyid Mehmed’e kırk yedi esedî guruş îdâ‘ ve teslîm ol dahi istid‘â ve kabz etmeğin hâlâ meblağ-ı mezbûru taleb eylediğimde bana edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsına mübeyyine beyyine taleb olundukda udûl-i Müslimînden olup mahmiye-i mezbûrede Ali Paşa-yı Atîk Mahallesi’nde sâkin Ahmed Çelebi b. Ali Efendi ve Şehzâde kurbünde Baklavacı odalarında sâkin Mehmed b. Hüseyin nâm kimesneler li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ işbu müdde‘î-i mezbûr Süleyman bundan akdem kasaba-i Çorlu’da sâkin Dimitri nâm zimmînin menzilinde merkūm es-Seyyid Mehmed’e bizim huzûrumuzda kırk yedi esedî guruş îdâ‘ ve teslîm ol dahi istid‘â ve kabz eyledi biz bu husûsa bu vech üzre şâhidleriz şehâdet dahi ederiz deyü her biri edâ-i şehâdet-i şer‘iye ettiklerinde ba‘de ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’r-râbi‘ aşer min-Saferü’l-hayr li-sene ihdâ ve tis‘în ve elf. Şuhûdü’l-hâl: Mehmed Çelebi b. Haydar, Ahmed Çelebi b. Abdurrahman, Ebûbekir Efendi b. ( ), Mustafa Efendi b. Abdülaziz.